Read Lamkang Товит 13 Bible Online

Товит 13 - Lamkang bible

Товит 13

¹Тогаш Товит, исполнет со радост, напиша молитва со овие зборови: »Благословен е Бог, Кој вечно живее и царството Негово е благословено!

²Зашто Он казнува и милува, испраќа во пеколот и изведува оттаму; никој не може да избега од Неговата рака.

³Синови Израилеви, прославувајте Го пред незнабошците, зашто Он нѐ распрсна меѓу нив.

⁴Таму објавувајте го величието Негово, издигнувајќи го над сѐ што живее, зашто Он е нашиот Господ Бог, Он е нашиот Татко низ вековите.

⁵Он нѐ казнува за нашите лоши дела, но пак ќе се смилува и ќе нѐ собере од сите народи, меѓу кои сме расеани — каде и да сме.

⁶Ако се обраќате кон Него со сето срце свое и со сета душа своја, ако ја извршувате пред Него вистината, Он ќе се сврти кон вас и нема да го скрие Своето лице од вас. Ќе видите што ќе направи со вас. Прославувајте Го со сите зборови на вашата уста, благословувајте Го Бога на правдата и вознесувајте Го Царот на вековите. Јас Го прославувам во земјата на моето робување и проповедам за Неговата сила и величина на народ од грешници. Обрнете се, грешници, и извршувајте го она што е право пред Него. Кој знае, може ќе погледне и на вас и ќе се смилува на вас!

⁷Јас Го превознесувам мојот Бог — Небесниот Цар, и душата моја, се радува на Неговата величина.

⁸Сите нека говорат за Него и нека Го прославуваат во Ерусалим.

⁹Ерусалиме, граде свет, Он ќе те казни за делата на твоите синови и пак ќе те помилува за твоите праведници.

¹⁰Со усрдност прославувај Го Господа и благословувај го Царот на вековите, та одново со радост да биде издигната Неговата скинија, за да се израдуваат незнабошците во тебе и несреќните да најдат во тебе љубов од сите поколенија во сите векови.

¹¹Многу народи ќе дојдат од далеку кон името на Господа Бога, ќе носат дарови на своите раце, дарови за Небескиот Цар; многу поколенија ќе Те прославуваат со радосни воскликнувања.

¹²Проколнати да бидат сите што Те мразат, а за секогаш благословени оние што Те сакаат!

¹³Радувај се и весели се за Твоите праведни синови, зашто ќе бидат собрани и ќе Го благословуваат Господа на праведниците.

¹⁴Блажени се оние што Те сакаат и што му се радуваат на Твојот мир! Блажени се оние што се натажени поради Твоите страдања, зашто ќе се зарадуваат кога ќе ја видат Твојата слава и вечно ќе се радуваат.

¹⁵Душата моја да Го благословува Бога — Великиот Цар!

¹⁶Оти Ерусалим ќе биде изграден од сафир и смарагд и од скапоцени камења, а ѕидините, кулите и тврдините — од чисто злато.

¹⁷Плоштадите негови ќе бидат поплочани со берил, антракс и офирски скапоцени камења.

¹⁸По сите негови улици ќе се огласува песната ‚Алилуја‘ и ќе се славословат, велејќи: ‚Благословен е Оној Кој го воздига Ерусалим за сите векови!‘«