Read Lamkang Товит 6 Bible Online

Товит 6 - Lamkang bible

Товит 6

¹И Ана престана да плаче.

²Приквечер патниците пристигнаа до реката Тигар, и таму ја поминаа ноќта.

³Момчето отиде до реката да се измие, но оттаму излезе голема риба и сакаше да го проголта.

⁴Тогаш ангелот му рече: »Улови ја таа риба!« Момчето ја фати рибата и ја извлече на земјата.

⁵И му рече ангелот: »Распори ја рибата, извади го срцето, црниот дроб и жолчката и чувај ги!«

⁶Тој направи така како што му рече ангелот, а рибата ја испекоа и ја изедоа, па го продолжија својот пат и дојдоа до Екбатана.

⁷Товија го праша ангелот: »Брате Азарија, зошто ни се потребни срцето, црниот дроб и жолчката од рибата?«

⁸А тој му одговори и рече: »Ако некого го измачува демон, односно лошиот дух, тогаш пред таков маж или жена треба да се кади со срцето и црниот дроб и веќе нема да се измачува,

⁹а со жолчката се намажуваат очите, на кои има бели петна, и потоа човекот со такви очи оздравува.«

¹⁰А кога се приближија до Рага,

¹¹ангелот му рече на Товија: »Брате, денес ќе преноќуваме кај Ригуил, твојот роднина, кој има ќерка, која се вика Сара.

¹²Јас ќе поразговарам и ќе гледам да ти ја дадат за жена, зашто нејзиното наследство ти припаѓа тебе, бидејќи си од нејзиниот род, а девојката е прекрасна и умна.«

¹³А сега, послушај ме: »Јас ќе зборувам со татка н, па кога ќе се вратиме од Рага, ќе направиме свадба. Јас го познавам Рагуила и знам, дека според Мојсеевиот закон, нема да ја даде својата ќерка на друг маж; а кога би го направил тоа, тој би заслужил смрт, зашто наследството треба да го добиеш ти, а не некој друг.«

¹⁴Тогаш Товија му рече на ангелот: »Брате Азарија, сум слушал дека таа девојка веќе ја давале на седум мажи и дека сите тие биле најдени мртви во свадбената соба,

¹⁵а јас сум единец син на мојот татко, па се плашам, кога ќе влезам при неа, дека ќе умрам како сите пред мене, бидејќи неа ја сака некој демон, кој не им прави зло на другите, освен на оние што се приближуваат до неа. Затоа се плашам да не умрам, и по мене, поради жалоста, да не ги одвлечкам во гроб мојот татко и мојата мајка, а немаат друг син за да ги погребе.«

¹⁶Ангелот му рече: »Зар ги заборави зборовите на твојот татко, кој ти заповеда да земеш жена од твојот род? Послушај ме, брате, таа треба да ти биде жена, а од демонот не се плаши; таа уште ноќеска ќе биде твоја жена.

¹⁷Само штом ќе влезеш во брачната соба, веднаш земи ја кадилницата и стави во неа малку од срцето и малку од црниот дроб на рибата и покади;

¹⁸а демонот, штом ќе ја почувствува миризбата, ќе избега и веќе нема никогаш да се врати. А кога ќе се приближиш до неа, застанете двајцата, повикајте го Семилостивиот Бог и Он ќе ве помилува и ќе ве спаси. Не плаши се; таа е одредена за тебе од секогаш, ти ќе ја спасиш; таа ќе појде со тебе и јас знам дека ќе имаш деца со неа.« Кога Товија го ислуша сето тоа, веднаш ја засака со сета своја душа и силно се приврза за неа.