Read Lamkang Исход 12 Bible Online

Исход 12 - Lamkang bible

Исход 12

¹И рече Господ на Мојсеја и на Арона во земјата Египетска, велејќи:

²»Овој месец да ви биде почеток на месеците, да ви биде прв месец меѓу месеците во годината.

³Кажи му на целиот собор на синовите Израилеви и речи им: ‚На десеттиот ден од овој месец секој нека земе јагне шилеже според бројот на челадта: значи, по едно на дом.

⁴Ако се помалу во домот за едно јагне, нека го земе кај себе соседот, кој му е најблизок, со онолку души, колу што треба, за да можат да го изедат јагнето.

⁵А јагнето или јарето да ви биде здраво, машко, без недостаток, од една година; земете го од овците или од козите.

⁶И чувајте го до четиринаесеттиот ден од овој месец, а тогаш општиот собор Израилев нека го заколе, во приквечерина.

⁷И нека земат крв од него и нека ги попрскаат обата довратника и праговите на куќата, во која ќе го јадат.

⁸И нека јадат месо истата ноќ, на оган печено, со пресен леб и со горчливо зелје, нека јадат.

⁹Немојте да јадете сурово, ниту во вода варено, туку на оган печено: со главата, со нозете и со дробовите.

¹⁰И ништо немојте да оставате до утрината; и коски не кршете од него; ако нешто од него остане до утрината, изгорете го на оган.

¹¹А вака јадете го: преопашани, обувките да ви се на нозете и стаповите ваши во рацете ваши, и јадете брзо: тоа е Пасха Господова.

¹²Оти ќе поминам низ земјата египетска таа ноќ, и ќе го убијам секој првороден во земјата Египетска, од човек до добиток, и ќе се одмаздам на сите богови египетски. Јас сум Господ.

¹³А крвта ќе ви биде знак на куќите, во кои ќе бидете таму: и кога ќе видам крв, ќе ве одминам, па нема да има меѓу вас помор, кога ќе ја поразам земјата египетска.

¹⁴И тој ден ќе ви биде ден на сеќавање и празнувајте го тој празник, посветен на Господа; празнувајте го од колено на колено; вечно озаконет.

¹⁵Седум денови јадете лебови без квас; уште од првиот ден отстранете го квасот од куќите ваши; зашто оној, кој ќе јаде нешто со квас, тој ќе биде истребен од Израилот.

¹⁶Првиот ден да се нарече свет собор; а и седмиот ден да ви биде особено свет; никаква работа да не вршите во тие денови. Освен за јадењето, за кого колку што треба, само тоа можете да го правите.

¹⁷И запазете ја оваа заповед; зашто во тој ден ја изведов војската ваша од земјата египетска; празнувајте го тој ден од колено на колено како вечно озаконет.

¹⁸Бесквасни лебови почнете да јадете од првиот месец во четиринаесеттиот ден вечерта, па сѐ до дваесет и првиот од истиот месец до вечерта.

¹⁹Седум денови не смее да има квас во куќите ваши. Оти, ако некој јаде нешто со квас, ќе биде истребена таа душа од општеството на Израилот, било да е придојдена — или родена во земјата.

²⁰Ништо со квас немојте да јадете: во сите куќи ваши јадете само бесквасен леб!‘«

²¹И ги свика Мојсеј сите старешини на синовите Израилеви и им рече: »Одете и пригответе јагне, според семејствата свои, и заколете пасха.

²²Потоа земете китка исоп и натопете ја во крвта, што е близу до вратите, и попрскајте ги праговите и обата довратника со крвта, што е близу до вратите, и ниеден од вас да не излегува низ вратата куќна до изутрина.

²³И кога ќе помине Господ да го поразува Египет, штом ќе ја види крвта на прагот и на обата довратника, ќе ја одмине Господ таа врата, и нема да му дозволи на истребителот да влезе во куќите ваши и да убива.

²⁴Пазате го ова како закон за себе и за синовите свои довека.

²⁵И кога, пак, ќе влезете во земјата, што ќе ви ја даде Господ, како што рече, држете ја оваа служба.

²⁶И кога ќе ве прашаат синовите ваши: ‚Каква ви е таа служба?‘

²⁷Одговорете: ‚Тоа е Пасхална жртва на Господа, кога ги одмина куќите на синовите Израилеви во Египет, убивајќи ги Египтјаните, а домовите наши ги зачува.‘« — Тогаш народот, наведнувајќи се, се поклони.

²⁸И откако отидоа синовите Израилеви, направија така, како што им заповеда Годпод преку Мојсеја и Арона: така направија.

²⁹А на полноќ ги уби Господ сите првородени во земјата Египетска, од првородениот син Фараонов, кој требаше да седи на престолот негов, до првородениот син на затвореникот во затворот, и се што беше првородено во добитокот.

³⁰И стана Фараонот во таа ноќ, тој и сите негови слуги, и сите Египтјани; и настана голем пискот во целата земја египетска, зашто немаше куќа, во која немаше мртовец.

³¹Тогаш ги повика Фараонот Мојсеја и Арона, ноќта, и им рече: »Станете, одете си од народот мој, како вие така и синовите Израилеви, и извршете Му служба на Господа, како што велевте.

³²Земете ги и овците ваши, говедата ваши, како што велевте и одете си, па и мене благословете ме!«

³³И Египтјаните навалуваа на народот, што побрзо да си оди од земјата, зашто велеа: »Сите ќе изгинеме!«

³⁴И народот си го зеде тестото свое, уште неискиснато; ноќвите ги завиткаа во облеките свои, и го ставија на рамењата свои.

³⁵И постапија синовите Израилеви според заповедта Мојсеева, и побараа од Египтјаните накити сребрени и накити златни, а и облека.

³⁶И Господ направи, та народот најде милост кај Египтјаните, и тие им дадоа; така тие ги обраа Египтјаните.

³⁷И тргнаа синовите Израилеви од Рамзес за Сокхот, околу шестотини илјади пешаци мажи, не сметајќи ги тука децата.

³⁸И многу други придојдени отидоа со нив, и овци и волови голем број отидоа со нив.

³⁹А од тестото, што го изнесоа од Египет, испекоа бесквасни лепчиња, зашто тоа уште не беше скиснато кога ги истераа Египтјаните, и не можеа да се задржуваат, така што дури ни храна за попат не си приготвија.

⁴⁰Времето, пак, што го поминаа синовите Израилеви во Египет и во земјата Хананска, тие и нивните татковци, изнесуваше четиристотини и триесет години.

⁴¹А кога се навршија четиристотини и триесетте години, ноќе во истиот ден излезе сета војска Господова од земјата египетска.

⁴²Таа ноќ, која Господ ја пробдеа, за да ги изведе од Египетската земја, тоа е ноќ Бдение за Господа, кое треба да го празнуваат синовите Израилеви од колено на колено.

⁴³И им рече Господ на Мојсеја и на Арона: »Закон за Пасхата е: ниеден туѓинец да не јаде од неа!

⁴⁴А секој роб ваш, или купен за пари, откако ќе го обрежете, тогаш може да јаде од неа.

⁴⁵Придојден или наемник да не јаде од неа!

⁴⁶Во една куќа треба да јадете; не оставајте за изутрина и не изнесувајте надвор од куќата, и коските од жртвата да не кршите.

⁴⁷Целото општество Израилево нека прави така.

⁴⁸Ако дојде кај вас некој туѓинец и посака да ја празнува Пасхата Господова, нека му се обрежат сите од машки пол, па потоа нека почне да ја празнува, и ќе биде како роден во таа земја; инаку, никој необрезан да не јаде од неа.

⁴⁹Еден закон нека има за родениот во таа земја и за придојдениот што дошол меѓу вас!«

⁵⁰И направија сите синови Израилеви како што им заповеда Господ на Мојсеја и на Арона, така направија.

⁵¹И во тој ден ги изведе Господ синовите Израилеви од земјата Египетска со нивната војска.