Read Lamkang Исход 15 Bible Online

Исход 15 - Lamkang bible

Исход 15

¹Тогаш, Мојсеј и синовите Израилеви ја запеаја оваа песна на Господа, велејќи: »Да Го воспеам Господа, зашто славно се прослави: коњите и коњаниците ги фрли в море.

²Помошник и закрилник ми беше во спасението. Он е Бог мој, и ќе Го прославувам; Бог на таткото мој, и ќе Го превознесувам.

³Господ ги ништи војните; името Му е Господ.

⁴Колите Фараонови и војската негова ги фрли в море; избраните војводи негови се удавија во Црвено Море.

⁵Бездните ги покрија; тие потонаа во длабочините како камен.

⁶Десницата Твоја, Господи, се прослави со сила; десната рака Твоја, Господи, го уништи непријателот.

⁷И со величието на славата Твоја Ти ги собори оние, кои станаа против Тебе, Ти го изли гневот Свој, и тој ги изгоре како слама.

⁸Од здивот на гневот Твој водите се расцепија, водите се издигнаа како бедем; среде морето брановите се затврднаа.

⁹Непријателот рече: ‚Ќе гонам, ќе стигнам, плен ќе разделам, ќе го господари раката моја.‘

¹⁰Ти дувна со здивот Твој, и морето ги покри; и тие потонаа како олово во силните води.

¹¹Кој е како Тебе меѓу боговите, Господи? Кој е како Тебе прославен во светоста Своја, прекрасен во славата Своја и Творец на чудеса?

¹²Ти ја пружи десницата Своја — а земјата ги голтна.

¹³Според милоста Твоја го водеше народот, кого Ти го избави, и го утешуваше со силата Своја, водејќи го во живеалиштето на Светоста Твоја.

¹⁴Народите ќе чујат и ќе се вознемират: ужас ќе ги опфати жителите на земјата Филистејска.

¹⁵Тогаш ќе побрзаат и поглаварите едомски, страв и трепет ќе ги обзема кнезовите моавски, ќе се уплашат сите жители ханански.

¹⁶Нека ги опфати страв и ужас; од силата на раката Твоја нека онемеат како камен, додека не помине народот Твој, Господи, додека не помине народот овој Твој, кого со го придобил.

¹⁷Одведи го и смести го во планините, наследството Твое, во место, кое Ти, Господи, си го приготвил за живеалиште Свое, во светилиштето создадено со рацете Твој, Господи!

¹⁸Господ ќе царува секогаш и во вечност.

¹⁹Кога коњите Фараонови со колите негови и со коњаниците негови влегоа во морето, Господ ги поврати врз нив водите морски: а синовите Израилеви поминаа по суво среде море.«

²⁰И пророчицата Маријам, сестрата Аронова, зеде тимпан во раката своја, а по неа излегоа сите жени со тимпани и во хор.

²¹И запеа Маријам пред нив: »Пејте Му на Господа, зашто славно се прослави: коњот и коњаникот в море ги фрли.«

²²Потоа ги изведе Мојсеј синовите Израилеви од Црвеното Море, и тие се упатија во пустињата Сур; и одејќи низ пустињата три дена не најдоа вода за пиење.

²³Дојдоа во Мера, но не можеа да пијат вода во Мера, зашто беше горчлива; затоа и го нерекоа тоа место Мера.

²⁴Тогаш народот почна да вика против Мојсеја, велејќи: »Што ќе пиеме?«

²⁵Извика Мојсеј кон Господа, и Господ му покажа дрво. Тој го фрли дрвото во вода, и водата стана слатка. Таму му даде наредби и закони, и таму го подложи на испитание.

²⁶И му рече: »Ако го послушаш добро гласот на Господа твојот Бог, ако правиш, што е угодно пред очите Негови, ако ги слушаш заповедите Негови, ако ги пазиш сите наредби Негови, нема да ти пратам ниедна од болестите, што ги пратив над Египет. Зашто Јас сум Господ, Бог твој целител.«

²⁷Потоа стигнаа во Елим; таму имаше дванаесет извори и седумдесет палми; и сите се утаборија тука крај водите.