Read Lamkang Исход 20 Bible Online

Исход 20 - Lamkang bible

Исход 20

¹Тогаш Господ Бог ги кажа сите овие зборови кон Мојсеја, велејќи:

²»Јас сум Господ, Бог твој, Кој те изведе од земјата Египетска, од домот на ропството.

³Немој да имаш други богови освен Мене!

⁴Не прави за себе идол, ниту каква слика на она, што е горе на небото, што е долу на земјата и што е во водата под земјата;

⁵немој да им се клањаш, ниту да им служиш, оти Јас сум Господ, Бог твој; Бог ревнител, Кој за гревовите на татковците ги казнуваа децата до третото и четвртото колено, оние, кои Ме мразат;

⁶Кој покажува милост на илјадници, кои Ме сакаат и ги пазат заповедите Мои.

⁷Не изговарај го напразно името на Господа, твојот Бог, бидејќи Господ нема да го остави неказнет оној, кој напразно ќе го изговори името Негово.

⁸Помни го денот саботен, за да го празнуваш.

⁹Шест дена работи, и сврши ги во нив сите работи свои;

¹⁰а седмиот ден е сабота Господова, на твојот Бог; тогаш немој да вршиш никаква работа, ни ти, ни синот твој, ни ќерката твоја, ни слугата твој, ни слугинката твоја, ни волот твој, ни ослето твое, ниту придојдениот, кој се наоѓа кај тебе.

¹¹оти за шест дена ги создаде Господ небото и замјата, морето и сѐ што е во нив; а во седмиот ден си отпочина: заради тоа Господ го благослови седмиот ден и го освети.

¹²Почитувај ги таткото свој и мајката своја, за да ти биде добро и да поживааш подолго на земјата, што ти ја дава Господ, твојот Бог.

¹³Не убивај!

¹⁴Не врши прељуба!

¹⁵Не кради!

¹⁶Не сведочи лажно против својот ближен!

¹⁷Не пожелувај ја жената на ближниот свој, не пожелувај го домот на ближниот свој, ниту нивата негова, ни слугата негов, ни слугинката негова, ни волот негов, ни ослето негово, ни секаков добиток, ниту нешто друго, кое е на ближниот твој!«

¹⁸И сиот народ ги слушаше молњите и гласот на трубата што трубеше и ја гледаше гората што се димеше; и како се исплашија, сите луѓе отстапија и се оддалечија малку.

¹⁹Па му рекоа на Мојсеја: »Зборувај ни ти, а ние ќе слушаме; но да не ни зборува нам Бог, за да не умреме.«

²⁰А Мојсеј им рече: »Не плашете се: Бог дојде за да ве испита и стравот Негов да биде во вас, за да не грешите.«

²¹И народот стоеше подалеку, а Мојсеј појде кон мракот, каде што беше Бог.

²²И му рече Господ на Мојсеја: »Вака кажи му на домот Јаковов и извести ги синовите Израилеви: ‚Вие видовте како Јас зборував со вас од небото.‘

²³Не правете си сами богови сребрени, ниту богови златни, не правете сами за себе.

²⁴Направете ми жртвеник од земја и на него принесувајте ми жртви сепаленици и жртви спасителни; овци и јунци ваши, на секое место, каде што ќе определам да се спомнува името Мое, ќе дојдам кај тебе и ќе те благословам.

²⁵Ако ми направиш жртвеник од камен, немој да го ѕидаш со делкан камен; зашто, штом ќе повлечеш по него со сечиво, ќе го оскверниш.

²⁶И да не се качуваш по стапалата до жртвеникот Мој, за да не се открие на него голотијата твоја.«