Read Lamkang Исход 25 Bible Online

Исход 25 - Lamkang bible

Исход 25

¹И му рече Господ на Мојсеја, велејќи:

²»Кажи им на синовите Израилеви да Ми соберат прилог: земете прилог кој од драго срце Ми дава.

³А прилогот што ќе го земете од нив да биде: злато, сребро и бакар;

⁴преѓа сина, црвена и темноцрвена како вткаен висон и козина;

⁵и убави кожи овнешки црвени, кожи сини и дрво ситим;

⁶масло за светење, и мириси за маслото за помазание и за мирисно кадило;

⁷камења оникс и камења за украсување на ефодот и наградникот.

⁸Да Ми направите светилиште, од каде што ќе ви се јавувам вам.

⁹Сѐ, како што ќе ти покажам Јас на планината: и образецот на скинијата, и образецот на сите нејзини сосуди — така да направат.

¹⁰Направи ковчег на сведоштвото од дрвото ситим, во должина од два лакта и пол, а во ширина на еден и пол лакот, и во висина еден и пол лакот;

¹¹и позлати го со чисто злато: позлати го одвнатре и однадвор; направи му златен венец околу врвот;

¹²и излиј за него четири алки од злато, и постави ги на четирите негови страни: две алки од едната страна и две алки од другата страна.

¹³Направи од дрвото ситим лостови, позлати ги со чисто злато,

¹⁴и провлечи ги лостовите низ алките од обете страни на ковчегот, за да се носи на нив ковчегот;

¹⁵лостовите во алките на ковчегот нека стојат, да не се вадат од нив.

¹⁶А во ковчегот положи ги сведоштвата, што ќе ти ги дадам.

¹⁷Направи исто така и очистилиште — поклопец од чисто злато, долго два лакта и пол, а широко еден и пол лакот.

¹⁸И направи два херувима од злато, леани направи ги и постави на двата краја од поклопецот;

¹⁹да се направат херувими: еден од една страна, а втор од друга страна на поклопецот; направи два херувима на обете страни;

²⁰херувимите да бидат со крилата угоре, та со крилата да го засолнуваат поклопецот, а со лицата свртени еден спроти друг; лицата на херувимите нека бидат свртени кон очистилиштето.

²¹И стави го поклопецот одозгора над ковчегот, а во ковчегот положи ги сведоштвата, што ќе ти ги дадам Јас:

²²и тука, над поклопецот, меѓу двата херувима, кои ќе бидат над ковчегот на сведоштвото, ќе ти се јавувам тебе и отаде ќе ти зборувам тебе и за си ќе им заповедам преку тебе на синовите Израилеви.

²³Направи и трпеза од дрвото ситим: долга два лакта, а широка еден лакот, висината да и е лакот и половина.

²⁴И позлати ја со чисто злато, а направи и златен венец наоколу:

²⁵и направи пораб и на венецот наоколу исто;

²⁶а направи за неа и четири алки од злато, и прицврсти ги алките на четирите страни од нејзините четири нозе, под венецот;

²⁷на страниците нека има алки, за да можат во нив да се стават лостови, па трпезата со нив да се подигнува;

²⁸направи ги лостовите од дрвото ситим и позлати ги со чисто злато; и со нив ќе се крева трпезата.

²⁹Направи за неа чинии, кадилници, чаши и црпки, со кои ќе се врши преливање; а ќе ги направиш од чисто злато.

³⁰На трпезата поставувај ги секогаш лебовите принесени пред Мене.

³¹И направи светилник од чисто злато; светилникот нека биде излеан; неговиот столб, неговите гранки и чашки со јаболкца и неговите цветови — и сите тие на него нека бидат;

³²шест гранки нека излегуваат од страните: три гранки од едната страна на светилникот, а три гранки од другата страна на светилникот;

³³три чашки во облик на оревче, со јаболче и цветови нека има едната гранка, и три чашки како бадемов цвет, со јаболче и цветови на другата гранка; и така нека има на шесте гранки, што излегуваат од светилникот,

³⁴а на самиот светилник нека има четири чашки во вид на орев, јаболкца и цветови;

³⁵едно јаболче под две гранки, од него, и едно јаболче под другите две гранки, од него, и едно јаболче од другите две гранки, така нека има шест гранки што излегуваат од светилникот, и на светилникот четири чашки во вид на орев.

³⁶Јаболчињата и гранките нивни од него треба да излегуваат; целиот да биде излеан од чисто злато.

³⁷И направи му седум кандила, и стави ги кандилата негови да светат од предната негова страна;

³⁸а и штипките и пепеларките за нив нека бидат од чисто злато направени;

³⁹од талант чисто злато да ги направиш сите тие сосуди.

⁴⁰И гледај да ги направиш според образецот, што ти беше покажан на планината.«