Read Lamkang Исход 28 Bible Online

Исход 28 - Lamkang bible

Исход 28

¹»А ти земи го при себе Арона, братот твој, со синовите негови, за да Ми свештенодејствуваат; Арон и Надав, Авијуд, Елеазар и Итамар — синовите Аронови.

²И направи му свети одежди на Арона, братот твој, за чест и слава.

³И кажи им на сите надарени со ум, кои сум ги исполнил со дух на премудрост и расудување, за да му направат на Арона одежди, со кои ќе ми служи во светилиштето.

⁴А ова се одеждите што треба да ги направат: наградник, ефод, наметка, везен хитон, кидар и појас. Нека направат свети одежди за Арона, и за синовите негови, во кои ќе Ми свештенодејствуваат.

⁵Затоа и овие нека земат злато и ткаенина сина, црвена и темноцрвена и висон;

⁶па нека направат ефод од висон ткаен, изработка шарено ткаена.

⁷На него два нараменика нека има, кои се врзуваат на двата краја, за да се држат заедно.

⁸И ткаењето на ефодот, кој е одозгора, нека биде иста изработка: од злато, од ткаенина сина, црвена и темноцрвана и од висон.

⁹И земи два камена смарагд, и изрежи ги на нив имињата на синовите Израилеви:

¹⁰шесте имиња нивни на едниот камен, а другите шест имиња на вториот камен, според нивното племе;

¹¹со помошта на резбар, преку вешт каменорезец, кој длаби печати, ќе ги изрежеш на тие два камена имињата на синовите Израилеви.

¹²Тие два камена потоа стави ги на нарамениците од ефодот, како камења за сопмен на синовите Израилеви: и Арон нека ги носи имињата на синовите Израилеви пред Господа на обете рамења за нивни спомен.

¹³Направи и две рамки од чисто злато,

¹⁴потоа две веришки од чисто злато ишарани, направи ги со цветови, па закачи ги плетените веришки на рамките, од нараменикот нивни однапред.

¹⁵И градник судиски направи, везен, направи го како по составот на ефодот: од злато, од ткаенина сина, црвена и темноцрвана и од висон ткаен направи го;

¹⁶четириаголен да биде, двоен, педа долг и педа широк;

¹⁷нареди по него во четири реда скапоцени камења. Во првиот ред: сард, топаз и смарагд,

¹⁸во вториот ред: антракс, сафир и јаспис;

¹⁹во третиот ред: лигур, ахат и аметист;

²⁰во четвртиот ред: хрисолит, јаспис и оникс. Опточи ги со злато, а нека бидат поставени во златни рамки, да бидат на својот ред.

²¹Тие камења со имињата на синовите Израилеви треба да бидат дванаесет, според имињата нивни: нека бидат врежани како печат, со по едно име од бројот на дванаесетте племиња.

²²И на наградникот стави веришки вити, исплетени од чисто злато.

²³Направи и две алчиња златни за наградникот, и двете алчиња прицврсти ги за двата краја на наградникот,

²⁴па провлечи ги двете златни веришки низ двете алчиња за краевите од наградникот,

²⁵а другите два краја од двете веришки закачи ги за двете копчиња и стави ги на нарамениците од ефодот, од предната страна.

²⁶Направи и уште други две алчиња златни, па стави ги на другите два краја од наградникот, од крај в крај на ефодот назад, одвнатре,

²⁷а направи и две златни алчиња, и прицврсти ги за двата нараменика на ефодот, одоздола, од неговата предна страна, каде што се соединува, над појасот.

²⁸Потоа алчињата на наградникот нека се врзат за алчињата на ефодот со сина врвка плетена од волна, та да не се одделува наградникот од ефодот.

²⁹А Арон нека ги носи имињата на синовите Израилеви преку наградникот судиски над срцето свое кога ќе влагува во светилиштето, за спомен пред Бога.

³⁰А во наградникот судиски стави ги Урим и Тумим; и тие ќе бидат на градите Аронови, кога влегува пред Госдпода; а Арон секогаш ќе го носи над градите свои судот на синовите Израилеви пред Господа.

³¹Направи и наметка за ефодот, целата сина;

³²одозгора во средината нека има прорез за главата; и нека биде работ на прорезот наоколу опшиен со ширит ткаен, така што наметката да не се реси;

³³и по полите нејзини направи топченца од сина, црвена и темноцрвана ткаенина, и темен висон наоколку, а меѓу нив и златни ѕвончиња:

³⁴ѕвонче златно па топче, ѕвонче златно па топче по полите на наметката насекаде наоколу.

³⁵Неа ќе ја носи Арон, кога ќе служи, за да се слуша гласот од неа кога ќе влегува во светилиштето пред лицето на Господа, а и кога излегува, та да не умре.

³⁶А направи и плочка од чисто злато, и на неа изрежи како на печат ‚Светиња Господова‘,

³⁷и да ја поставиш на сина ткаенина за кидарот, да стои од предната страна на кидарот;

³⁸да биде на челото Ароново, та Арон на себе да ги презема гревовите на приносите, што ги посветуваат синовите Израилеви од сите дарови, што му се принесуваат тие; и така, таа нека биде секогаш на Ароновото чело, за да бидат тие секогаш примени од Господа.

³⁹Направи и хитон од висон, и кидар од висон; а појасот направи го везен.

⁴⁰И на синовите Аронови направи им хитони, направи и кидари, и превивки за главата направи им, за чест и слава.

⁴¹Во тоа облечи го Арона, братот твој, и синовите негови со него; помажи ги, исполни им ги рацете, и освети ги, за да ми бидат свештеници.

⁴²А направи им и долна облека од лен, да се покрие голотијата од телото нивно, од крстот до бедрата, нека биде,

⁴³и да ги носи Арон, и синовите негови, кога влегуваат во скинијата на сведоштвото, или кога пристапуваат кон жртвеникот за служба во светилиштето, за да не навлечат грев и не умрат. Тоа е вечен закон за него и за потомството негово по него.«