Read Lamkang Исход 37 Bible Online

Исход 37 - Lamkang bible

Исход 37

¹И направи Веселеил од дрвото ситим ковчег, два и пол лакти висок;

²го опкова одвнатре и однадвор со чисто злато и му направи златен венец наоколу;

³излеа за него четири алки од злато за четири негови страни: две алки за едната страна, а две за другата;

⁴направи лостови од дрвото ситим и ги опкова со злато;

⁵и ги провре лостовите низ алките од обете страни на ковчегот, за да може ковчегот да се носи.

⁶Потоа направи поклопец од чисто злато: во должина два лакти и половина, во ширина — лакот и половина.

⁷Направи и два херувима од злато; исковани ги направи за двата краја на поклопецот;

⁸едниот херувим на едниот крај, а другиот херувим на другиот крај; херувимите ги направи да се издаваат од обата краја на поклопецот.

⁹И херувимите беа со раширени крилја, одозгора, и со крилјата свои го покриваа очистилиштето, а со лицата свртени еден спрема друг, и насочени кон очистилиштето.

¹⁰Направи трпеза од дрвото ситим, со должина од два лакти и ширина од лакот, а лакот и половина во висина.

¹¹И ја опкова со чисто злато, и наоколу и направи златен венец;

¹²потоа и направи страници наоколу, колку дланка широки, а по страниците и направи златен венец.

¹³Излеа за неа четири алки од злато, и алките ги прицврсти на четирите агли при четирите нозе,

¹⁴на страниците имаше алки, низ кои беа проврени лостови, за да може трпезата да се носи.

¹⁵А лостовите ги направи од дрвото ситим, за носење на трпезата, и ги покри со злато.

¹⁶Потоа направи садови од чисто злато, определени за трпезата: чинии, кадилници, чаши и црпки, со кои ќе се прелива.

¹⁷Направи и свеќник од чисто злато, за да свети го направи: стеблото и гранките, чашките, јаболчињата и цветовите му излегуваа од него на двете страни.

¹⁸Гранките му излегуваа од страните: три гранки од свеќникот од едната страна, а три гранки на свеќникот од другата страна;

¹⁹три чашки како бадемов цвет со јаболче и цветови имаше на едната гранка, а три чашки како бадемов цвет со јаболче и цветови на другата гранка; така беше на сите шест гранки што излегуваа од свеќникот.

²⁰А на самиот свеќник имаше четири чашки како бадемов цвет со јаболчиња и цветови:

²¹едно јаболче беше под двете гранки од него, и едно јаболче под другите две гранки од него; така и под третите две гранки од шесте гранки што излегуваа од него.

²²Јаболчињата нивни и гранките нивни излегуваа од него; целиот искован од чисто злато.

²³И му направи седум кандилца, а и секачи и пепеларки од чисто злато;

²⁴од талант чисто злато го направи со сите негови потреби.

²⁵И направи жртвеник за кадење од дрвото ситим: лакот долг и лакот широк, четириаголен, два лакти висок; и од него му излегуваа роговите;

²⁶па го опкова со чисто злато одозгора и страните наоколу, а и неговите рогови; му направи и златен венец наоколу;

²⁷и две алки од злато му направи под венецот на двата агли негови, ги направи од двете негови страни, за да се спроврат низ нив лостовите, за да може да се носи.

²⁸Лостовите ги направи од дрвото ситим, и го опкова со злато.

²⁹И направи миро за свето помазание и мирисно кадиво, чисто со вештина на мироварец.