Read Lamkang Исход 5 Bible Online

Исход 5 - Lamkang bible

Исход 5

¹А потоа влегоа Мојсеј и Арон кај Фараонот, па му рекоа: »Вака вели Господ, Бог Израилев — ‚Пушти го народот Мој, да празнува празник во Моја чест во пустињата.‘«

²Но Фараонот рече: »Кој е, за да Го послушам гласот Негов, и да ги пуштам синовите Израилеви? Не Го познавам Господа, ниту ќе го пуштам Израилот.«

³А тие рекоа: »Бог на Евреите нѐ повика нас три дена пат да одиме во пустињата, за да Му принесеме жртва на Господа, нашиот Бог, та да не испрати Он на нас смрт или убиство.«

⁴Тогаш царот египетски им рече: »Зошто вие, Мојсеј и Ароне, го одвлекувате народот од работата негова? Одете си секој од вас по своја работа!«

⁵И Фараонот уште додаде: »Ете, сега се намножи народот во земјата, но нема да му дадеме почивка од работите.«

⁶И им заповеда Фараонот на надзорниците за работа над народот и на настојниците негови, и рече:

⁷»Отсега на народот нема да му давате плева за правење тули, како досега: туку сами нека одат да си собираат плева.

⁸А колку тули досега правеле, настојувајте толку да правет и отсега: ништо не намалувајте; оти се без работа, па затоа викаат и велат — ‚Да одиме и да Му принесеме жртва на нашиот Бог.‘

⁹Нека им се зголеми работата на тие луѓе; тогаш ќе се грижат за тоа и нема да слушаат празни зборови.«

¹⁰И ги принудија нив надзорниците и настојниците, и му рекоа на народот: »Вака вели Фараонот: нема да ви даваме веќе плева;

¹¹одете сами и собирајте си плева, каде што ќе најдете; а од работата нема ништо да ви се намали.«

¹²И се разотиде народот по целата земја Египетска за да собира стрника наместо плева.

¹³А надзорниците навалуваа, велејќи: »Вршете ги определените работи ваши секој ден, како и порано кога имавте плева.«

¹⁴И настојниците од родот на синовите Израилеви, кои ги поставија над нив надзорниците на Фараонот, беа биени и им се велеше: »Зошто и денес не изработивте толку тули, колку што ви е определено, како што правевте и порано?«

¹⁵И отидоа настојниците на синовите Израилеви пред Фараонот, па извикаа и рекоа: »Зошто постапуваш така со слугите твои?

¹⁶Плева не им се дава на слугите твои, а пак ни се вели: ‚Правете тули.‘ И ете, ги бијат слугите твои. Го онеправдуваат твојот народ.«

¹⁷Но тој им одговори: »Седите без работа, не работите, па затоа велите: ‚Да одиме да Му принесеме жртва на нашиот Бог.‘

¹⁸Затоа сега одете, работете; плева нема да ви се дава, а тули ќе предавате во определен број.«

¹⁹И насотјниците на синовите Израилеви се видоа во зло, оти им се рече: »Дневната количина на тулите не смеете да ја намалите.«

²⁰А кога излегоа од Фараонот, ги сретнаа Мојсеја и Арона, кои идеа во пресрет.

²¹Па им рекоа: »Бог нека види и нека ви суди што нѐ намразивте кај Фараонот и службениците негови, и им дадовте меч во радете, за да нѐ убиваат!«

²²Тогаш Мојсеј се обрна кон Господа и рече: »Господи, Ти се молам, Господи, зошто го воведе во невола овој народ и зошто ме испрати мене?

²³Оти, откако излегов пред Фараонот и проговорив во Твое име, тој уште полошо постапува со овој народ; и Ти не го избави народот Свој.«