Read Lamkang Јов 20 Bible Online

Јов 20 - Lamkang bible

Јов 20

¹Проговори Софар и рече:

²»Размислувањата мои ме поттикнуваат да одговарам, брзам да ги искажам.

³Срамен прекор чув за мене, но духот на мојот разум ќе одговори за мене.

⁴Зар не знаеш ти дека е тоа од памтивека, — откога е човекот поставен на земјата,

⁵дека славата на беззакониците е краткотрајна, и радоста на лицемерниот е за миг?

⁶И до небесата да се издигне величието негово, и до облаците да се допира главата негова, —

⁷тој засекогаш ќе пропадне, како и гадотиите негови; оние што го виделе, ќе кажат: — каде е тој?

⁸Како сон ќе одлета, и нема да го најдат; како ноќно привидение ќе исчезне.

⁹Кое око го видело, повеќе нема да го види, и местото негово повеќе нема да го зебележи.

¹⁰Синовите негови ќе им се умилкуваат на сиромасите, и рацете негови ќе го вратат она што го ограбил

¹¹Коските негови се полни со гревови на младините негови, со него ќе легнат тие во земјата.

¹²Ако злото е слатко во устата негова, и тој го крие од јазикот свој,

¹³го чува и не го фрла, туку го држи во устата своја, —

¹⁴сепак таа храна во утробата негова, внатре во него, ќе се претвори во змиски отров.

¹⁵Ќе го изблуе доброто што го голтнал: Бог ќе го исфрли од стомакот негов.

¹⁶Змиски отров ќе смука тој; јазикот на змијата ќе го умртви.

¹⁷Нема да види потоци и реки од мед и млеко.

¹⁸Спечаленото со труд ќе го врати, нема да го изеде; според имотот негов ќе стане и плаќањето негово; и тој нема да се зарадува.

¹⁹Зашто јадеше и ги напаѓаше сиромасите; заграбуваше куќи што не ги беше градел;

²⁰не знаеше ситост во стомакот свој, и во жедта своја ништо не штедеше.

²¹Ништо не се откинуваше од лакомоста негова, затоа и радоста негова нема долго да потрае.

²²При полно изобиле, тесно ќе му биде; рацете на сиромасите ќе се кренат врз него.

²³Кога има со што да го наполни стомакот негов, Тој ќе ја примени врз нега јароста на Својот гнев и ќе истури како дожд врз него болести во телото негово.

²⁴Ќе избега ли од железното оружје, — бакарен лак ќе го прободе.

²⁵Пуштената стрела ќе мине низ телото негово, ќе излезе со својот болскав врв низ жолчката негова; ужасите на смртта ќе се нафрлуваат врз него!

²⁶Сѐ што е мачно и сокриено во него, ќе го гори оган, од никого не раздуван; зло ќе ги снајде и другите во шаторот негов.

²⁷Небото ќе го открие беззаконието негово, а и земајта ќе се крене против него.

²⁸Ќе исчезне богатството на куќата негова; сѐ ќе се растури во денот на гневот Божји.

²⁹Тоа е делот од бога за беззакониот човек и наследство, определено за него од Вседржителот!«