Read Lamkang Јов 33 Bible Online

Јов 33 - Lamkang bible

Јов 33

¹»И така, слушај ги Јове, зборовите мои и внимавај на сите мои зборови.

²Еве, ја отварам устата своја, јазикот ми говори во устата моја.

³Зборовите мои се искрени од срцето мое, и устата моја ќе искаже чиста вистина.

⁴Духот Божји ме создал, и здивот на Вседржителот ми дал живот.

⁵Ако можеш, одговори ми и застани спроти мене.

⁶Еве ме мене, според твојата желба, место Бога. И јас сум направен од кал;

⁷поради тоа стравот пред мене не може да те збуни, и раката моја нема да биде тешка за тебе.

⁸Ти рече пред мене, и јас го чув гласот на твоите зборови:

⁹‚Чист сум, без порок, невин сум; во мене нема неправда;

¹⁰А Он најде обвинение против мене и ме смета за Свој противник;

¹¹нозете ми ги стави на клада, ги надгледува сите мои патишта.‘

¹²Ете, во тоа ти не си прав, ти одговарам; човекот со Бога не може да се мери.

¹³Зошто ти е да се бориш против Него? Он не дава сметка за Своите дела.

¹⁴Бог говори еднаш и двапати, но луѓето не внимаваат:

¹⁵на сон, во ноќно видение, кога сонот ги соборува луѓето, во време, кога спијат на своето легло,

¹⁶тогаш Он му отвора на човекот увото и го запечатува Своето кажување.

¹⁷за да го одвлече човекот од лошо дело, и да ја отстрани гордоста од него.

¹⁸за да ја запази душата негова од бездна, и животот негов од пораз со меч.

¹⁹Или, пак, го вразумува со болест на постелата негова, и со лута болка во сите коски негови, —

²⁰така што животот негов да се гади од лебот, душата негова од обичната храна.

²¹Телото негово исчезнува; коските негови се подаваат, кои пред тоа не се гледале.

²²Душата негова се приближува кон гробот, а животот негов — до смртта.

²³Ако има кај него Ангел пазител, еден од илјада, за да му го покажува правиот пат, —

²⁴Бог би се смилувал над него и би рекол: ‚Ослободи го од гробот; јас најдов откуп.‘

²⁵Тогаш телото негово ќе се подмлади повеќе, отколку во млади години; и тој ќе се врати во дните на младите свои години.

²⁶Ќе Му се моли на Бога, и Он ќе биде милостив спрема него; со радост ќе го погледнува лицето негово и ќе му ја враќа праведноста негова.

²⁷Тој ќе ги гледа луѓето и ќе вели: ‚сум грешел и сум ја обвинувал правдата, и не ми се помогна;

²⁸Бог ја ослободи душата моја од гроб; животот мој гледа светлина.‘

²⁹Ете, сето тоа Бог му го врши два до трипати на човекот,

³⁰за да ја изведе душата негова од бездната и да го просвети со светлината на живите.

³¹Внимавај, Јова, слушај ме, молчи, јас ќе зборувам.

³²Ако имаш нешто да кажеш, одговарај; говори, зашто би сакал да те оправдам;

³³ако, пак, не тогаш слушај ме: молчи и јас ќе те научам на мудрост.«