Read Lamkang Јов 5 Bible Online

Јов 5 - Lamkang bible

Јов 5

¹»Ајде викај! Има ли кој да ти одговори? Кон кого од светиите мислиш да му се обрнеш?

²Вистина, гневот го убива глупавиот, раздразнетоста го погубува безумниот.

³Видов како глупавиот се закоренува, но веднаш проклетството на домот негов падна.

⁴Децата негови се далеку од спасение, нив ќе ги бијат кај портите; зашто ќе нема кој да ги заштити.

⁵Жетвата негова ќе ја изедат гладните, низ трњето ќе ја извлечат; жедните ќе го голтнат имотот негов.

⁶Не, жалоста не излегува од земјата, нити злото изникнува од нивата;

⁷човекот се раѓа, за да страда, како и искрите — за да летаат угоре.

⁸Но јас би се обрнал кон Бога и делото свое пред Бога би го поставил.

⁹Он создава дела големи и неиспитливи, чудни и без број,

¹⁰и дава дожд на земјата и им испраќа вода на полињата;

¹¹понизените ги издигнува на високо, и натажените ги утешува и ги спасува.

¹²Он го урива она што лукавите го градат, рацете нивни не го довршуват започнатото.

¹³Он ги фаќа мудрите со нивното лукавство, и замислата на итрите се осуетува;

¹⁴Среде бел ден запаѓаат во темнина; попладне одат со пипање, како ноќе.

¹⁵Он го спасува сиромавиот од меч, од устата нивна и од раката на силниот.

¹⁶И за сиромавиот има надеж, а неправдата сама ја затвора устата своја.

¹⁷Блажен е оној човек кого Бог го вразумува. Затоа не ја отфрлувај казната од Вседржителот,

¹⁸зашто Он нанесува рани и Самиот ги преврзува; Он поразува, и Неговите раце лекуваат.

¹⁹Од шест беди ќе те избави и во седмата зло нема да те стигне.

²⁰Во време на глад ќе те спаси од смрт, и во војна — од силата на мечот.

²¹Од камшикот на јазикот ќе се сокриеш, и нема да се уплашиш од опустошувањето — кога ќе дојде.

²²На опустошувањето и на гладот ќе им се потсмееш, од ѕверовите земни нема да се уплашиш, —

²³зашто си во сојуз со камењата полски, а полските ѕверови се во мир со тебе.

²⁴Ќе дознаеш дека шаторот ти е во безопасност, ќе си ја гледаш куќата и нема да згрешиш.

²⁵Ќе видиш, оти семето ти е многубројно, дека филизите твои се како трева на земјата.

²⁶Ќе легнеш во гроб кога ќе стигнеш до зрелост, како што се редат житните снопја.

²⁷Ете, тоа сме го испитале: вистината е жива; затоа чуј го сето ова и запомни го добро.«