Read Lamkang Псалми 103 Bible Online

Псалми 103 - Lamkang bible

Псалми 103

¹Благословувај Го, душо моја, Господа, Господи, Боже мој, ти си севозвеличил; во слава и велелепие си се облекол;

²Ти си се облекол во светлина како со облека, си го прострел небото како шатор;

³со вода си ги покрил Твоите дворови, облаците си ги направил за да одиш по нив, кога се движиш — ветрот Ти служи како крилја.

⁴Ветровите ги правиш Свои гласници, а слугите Свои огнен пламен.

⁵Ти си ја поставил земјата на цврсти основи: таа нема да се разниша никогаш.

⁶Си ја покрил со бездна како со облака, води ќе стојат на горите.

⁷Од Твојата закана тие бегаат, од гласот на Твојот гром се бојат;

⁸се издигаат горите, се спуштаат долините, на места што си им ги определил.

⁹Си поставил граница преку која нема да преминат, ниту ќе се вратат да ја покријат земјата.

¹⁰Си управил извори во долините: меѓу горите течат води,

¹¹ги напојуваат сите полски ѕверови; дивите осли ја гаснат жедта своја.

¹²При нив живеат птици небесни, меѓу камењата пуштаат глас.

¹³Ти ги напојуваш горите од своите височини, од плодовите на Твоите дела се наситува земјата.

¹⁴Ти правиш да расте трева за добитокот и растение за потреба на луѓето, за да произведат леб од земјата

¹⁵и виното што го весели срцето на човекот, и елејот од кој блеска лицето негово, и лебот што го закрепнува срцето на човекот.

¹⁶Се заситуваат дрвјата по полето, кедрите ливански, што си ги посадил;

¹⁷на нив птиците си прават гнезда, елките им се живеалишта на штрковите.

¹⁸Високите гори — на срните; камењата — прибежиште на зајаците.

¹⁹Он ја создал месечината да ги определува времињата, сонцето го знае својот запад.

²⁰Спушташ темнина, и настанува ноќ: тогаш излегуваат сите горски ѕверови;

²¹лавовите рикаат за плен и бараат од Бога храна за себе.

²²Изгрева сонцето, а тие се собираат и легнуваат во своите легла;

²³човекот излегува по своја работи и работи до вечерта.

²⁴Колку се многубројни делата Твои, Господи! Сѐ си направил премудро; земјата е полна со Твои созданија.

²⁵А тоа море е големо и пространо; таму се движат безброј лазачи, мали и големи животни;

²⁶таму пловат кораби, таму е чудовиштето што си го создал да игра во него.

²⁷Сите тие од Тебе чекаат да им дадеш храна навреме.

²⁸Им даваш — примаат, ја отвораш раката Своја — се наситуваат со блага;

²⁹го одвратиш ли лицето Свое — се збунуваат, им го одземеш ли духот нивни — умираат и во земјата своја се враќаат.

³⁰Го праќаш ли духот Свој — се создаваат; Ти го обновуваш лицето на земјата.

³¹Нека пребива славата на Господа вечно; нека се весели Господ за делата Свои!

³²Погледнува ли кон земјата, и таа се тресе; се допре ли до горите, тие димат.

³³Ќе му пеам на Господа преку целиот мој живот, ќе му пеам на мојот Бог сѐ додека постојам.

³⁴Нека Му биде мила беседата моја! ќе се веселам во Господа.

³⁵Нека ги снема грешниците од земјата, и беззаконици да нема веќе! Благословувај Го, душо моја, Господа! Алилуја!