Read Lamkang Псалми 106 Bible Online

Псалми 106 - Lamkang bible

Псалми 106

¹Славете Го Господа, зашто е добар, зашто е вечна милоста Негова!

²Така да велат избавените од Господа, оние што ги избавил од непријателска рака.

³И ги собра од земјите, од исток и од запад, од север и од морето.

⁴Тие скитаа по безводната пустиња и нигде пат ниту населен град не најдоа;

⁵трпеа глад и жед, душата им ослабна во нив,

⁶но во жалоста своја Го повикаа Господа, и Он ги избави од нивните неволји

⁷и го поведе по правиот пат, за да одат кон населен град.

⁸Нека Го слават Господа за милоста Негова и за чудесата Негови што им ги направи на синовите човечки:

⁹зашто Он ја насити гладната душа, и душата гладна ја исполни со блага.

¹⁰Тие седеа во темнина и смртна сенка, оковани со сиромаштија и железо;

¹¹бидејќи не се покорија на зборовите Божји и се притивеа на волјата на Севишниот.

¹²Он го понизи нивното срце во мака, се сопнаа, и немаше кој да им помогне.

¹³Тогаш во тагата своја повикаа кон Господа, и Он ги спаси од маките нивни;

¹⁴ги изведе од темнината и смртната сенка и ги раскина оковите нивни,

¹⁵Нека го слават Господа за милоста Негова и за Неговите чудесни дела кон синовите човечки,

¹⁶зашто Он ги здроби бакарните порти и ги скриши железните резиња.

¹⁷Неразумните страдаа поради своите лоши патишта и поради неправдите свои!

¹⁸Од секоја храна им се одвраќаше душата, и се приближија до вратата на смртта.

¹⁹Но во тагата своја повикаа кон Господа, и Он ги спаси од неволјите нивни;

²⁰го испрати Своето слово, ги излекува и ги спаси од пропаст.

²¹Нека Го прославуват Господа за милоста Негова спрема синовите човечки!

²²Нека Му принесуваат похвална жртва и нека ги разгласуваат делата Негови со радост.

²³Оние што тргнуваат по море на кораби, што имаат работа по големите води —

²⁴тие ги гледаат делата на Господа и чудесата Негови во длабочините.

²⁵Он рече — и настана бурен ветер и високо ги издигна морските бранови;

²⁶се издигаа до небесата, слегуваа до бездната; нивната присебност се губи во неволјата;

²⁷тие се збунуваат, се нишаат како пијани, и сета нивна мудрост им исчезнува.

²⁸Тогаш во скрбта своја повикаа кон Господа, и Он ги изведе од маките нивни.

²⁹И ѝ заповеда на бурата и таа се претвори во тивок ветрец и брановите молкнаа.

³⁰Тие се развеселија, зашто стивнаа, а Он ги упати кон нивното сакано пристаниште.

³¹Нека Го прославуваат Господа за милоста Негова и за Неговите чудесни дела спрема синовите човечки!

³²Нека Го возвеличуваат со собранието народно и нека Го слават во советите на старешините!

³³Он создава реки во пустиња, и водни извори — на суви места,

³⁴земја плодородна — во солница, поради злобата на оние што живеат во неа.

³⁵Он претвори пустиња во езеро, а сува земја — во земја — со водни извори;

³⁶таму насели гладни, а тие изградија град за живеење;

³⁷засеаја ниви, насадија лози, и тие им даваат свои плодови.

³⁸Он ги благословуваше, и тие многу се размножуваа, и добитокот нивни Он не им го намалуваше.

³⁹Тие беа проредени и пострадаа од притисокот на злото и од неволјата.

⁴⁰Он изли бесчестие над кнезовите и ги остави да скитаат по пустињата, каде што нема патишта.

⁴¹Но бедниот го извлекува од сиромаштија, го умножува родот негов како овчо стадо.

⁴²Праведните го гледаат тоа и се радуваат, а секоја нечесност си ја затвора устата своја.

⁴³Кој е мудар и го пази ова, ќе ја разбере милоста Господова.