Read Lamkang Псалми 16 Bible Online

Псалми 16 - Lamkang bible

Псалми 16

¹Услиши ја, Господи, правдата моја, чуј го гласот на молбата моја, прими ја молитвата моја што не излегува од лажлива уста.

²Од Твоето лице нека излезе судот за мене; очите мои нека ја видат вистината.

³Ти го искуша срцето мое, ме посети ноќе; со оган ме провери и не најде неправда во мене.

⁴Човечки дела нека не зборува устата моја; поради зборовите на устата Твоја чекорев по патиштата тешки.

⁵Утврди ги стапките мои на патиштата Твои, за да не ослабнат нозете мои.

⁶Кон Тебе викам, зашто Ти ќе ме чуеш, Боже; приклони го увото Свое кон мене, и чуј ги зборовите мои.

⁷Покажи ја чудесната милост Твоја, Ти, кој ги избавуваш оние што се надеваат на Тебе — од оние што се противат на Твојата десница.

⁸Пази ме како зеница на окото; засолни ме под сенката на Твоите крила,

⁹од лицето на нечестивите, кои ме напаѓаат — од непријателите на душата моја, што ме опкружуваат:

¹⁰тие срцето свое го затворија, наоколу со устата своја — гордо зборуваат.

¹¹Гонејќи ме, сега ме опколуваат; тие ги управија очите свои, за да ме соборат на земја;

¹²тие се како лав, подготвен за лов и како лавче, кое стои во потајни места.

¹³Стани, Господи, пресретни ги и обори ги; спаси ја душата моја со Својот меч од нечестивиот;

¹⁴од оние, Господи, кои ги има малку на земјата — раздели ги во нивниот живот, и од она што е сокриено Твое ќе се наполни стомакот нивни; откако се наситија синовите нивни, од вишокот оставија и за децата свои.

¹⁵А јас пред лицето Твое ќе се покажам во правда, ќе се наситам кога ќе ми се покаже славата Твоја.