Read Lamkang Псалми 32 Bible Online

Псалми 32 - Lamkang bible

Псалми 32

¹Радувајте се, праведници, во Господа: на праведниците им прилега похвала.

²Славете Го Господа со гусли, пејте Му на псалтир со десет жици,

³пејте Му нова песна; пејте Му силно и со восклик,

⁴зашто словото на Господа е право, и сите дела Негови се вистински.

⁵Он сака милостиња и суд преведен; со милоста Господова е исполнета земјата.

⁶Преку словото на Господа се зацврстија небесата, и преку Духот на устата Негова — сите сили нивни.

⁷Он ги собира како во мев морските води; бездните ги става во сокровишта.

⁸Нека се бои од Господа целата земја; нека треперат пред Него сите жители во вселената,

⁹зашто Он рече и тие настанаа; Он заповеда и се создадоа.

¹⁰Господ ги руши помислите на незнабошците, ги спречува намерите нивни и ги сопира помислите на кнезовите.

¹¹А замислата Господова вечно постои; мислите на срцето Негово преминуваат од род во род.

¹²Блажен е оној народ, на кој Господ му е Бог, и луѓето, кои Он ги избрал за наследството Свое.

¹³Од небесата погледа Господ, ги виде сите синови човечки;

¹⁴од престолот, на кој седи, погледна на сите, кои живеат по земјата:

¹⁵Он, Кој на сите нимим ги создал срцата, ги знае сите дела нивни.

¹⁶Не го спасува царот голема војска; голема сила ни исполинот нема да го спаси.

¹⁷Несигурен е коњот за спасување, со глемата сила своја не може никогаш да се избави.

¹⁸Но, ете, очите Господови се врз оние, кои се бојат од Него и кои се надеваат на милоста Негова,

¹⁹дека Он ќе ја спаси душата нивна од смрт и во време на глад ќе ги прехрани.

²⁰Душата наша се надева на Господа: зашто Он е наш помошник и наш заштитник,

²¹зашто во Него ќе се весели срцето наше; оти на името Негово свето се надеваме.

²²Милоста Твоја нека биде над нас, Господи, онака како што Ти се надеваме.