Read Lamkang Псалми 44 Bible Online

Псалми 44 - Lamkang bible

Псалми 44

¹Од срцето мое се излива благ збор; му зборувам на Царот за делата мои; јазикот ми е како трска на брзописец.

²Ти си најпрекрасниот меѓу синовите човечки, благодат се излива од Твојата уста; затоа Бог Те благословил довека.

³Препаши го на бедрото мечот Свој, о силнику: во Својата красота и убавина!

⁴И така украсен, поитај и царствувај заради вистината, кротоста и правдата, и Твојата десница ќе покаже чудесни дела.

⁵Изострени се Твоите стрели, о јунаку, народите ќе паднат пред Тебе, — тие ќе се забодат во срцата на царските непријатели.

⁶Твојот престол, Боже, е вечен: жезлото на правдата е жезло на Твоето царство.

⁷Ти ја засака правдата и го намрази беззаконието; затоа, Боже, Твојот Бог, Те помаза со елеј на радоста повеќе од Твоите соучесници.

⁸Сите Твои облеки мирисаат на смирна, алој и касија; кога излегуваш од дворците од тешка слонова коска, во што наоѓаш радост.

⁹Царски ќерки се во Твојата почесна придружба; царицата стои покрај Тебе оддесно во облека украсена и со злато проткаена.

¹⁰Чуј, ќерко, види, приклони го увото свое и заборави го твојот народ и домот на таткото твој.

¹¹Зашто Царот ја посака твојата убавина, оти Он е твој Господар и приклони Му се тогаш ти.

¹²И ќерката тирска ќе Му се поклони со подароци и најбогатите меѓу народот ќе те замолат.

¹³Сета слава на царската ќерка е внатре: нејзината облека е везена со злато;

¹⁴во везена облека ќе ја доведуваат кај Царот; по неа водат при Тебе девици, нејзини другарки, и ги приведуваат кон Тебе,

¹⁵ги доведуваат со веселба и радост, влегуваат во Царевиот дворец.

¹⁶Место твоите татковци, овде ќе бидат твоите синови; Ти ќе ги поставиш за кнезови по целата земја.

¹⁷Ќе го спомнуваат името Твое од род во род; затоа народите ќе Те слават од век до век.