Read Lamkang Псалми 70 Bible Online

Псалми 70 - Lamkang bible

Псалми 70

¹На Тебе Господи, се надевам, да не останам посрамен вечно.

²Избави ме поради праведноста Своја и очисти ме; приклони го увото Свое кон мене и спаси ме.

³Биди ми Бог заштитник, изведи ме на место сигурно — зашто Ти си моја крепост и мое прибежиште.

⁴Боже мој, избави ме од рацете на грешникот, од рацете на престапникот и насилникот,

⁵зашто Ти си моја надеж, Господи, моја сигурност од младоста моја.

⁶За Тебе цврсто се држам од раѓањето мое; Ти си мој покровител од мајчината ми утроба; за Тебе вечно ќе пеам.

⁷За многумина бев како некое чудо, но Ти си мојот силен помошник.

⁸Нека се исполни устата моја со похвала, па со песна да ја величам славата Твоја; и цел ден да пеам за Твоето велелепие.

⁹Не отфрлај ме на старост, кога ќе почне силата моја да исчезнува, не напуштај ме,

¹⁰зашто непријателите мои зборуваат против мене; и оние, кои ја демнат душата моја, се договараат меѓу себе,

¹¹велејќи: »Го остави Бог; гонете го и фатете го, зашто нема кој да го избави«.

¹²Боже мој, не се оддалечувај од мене; Боже мој, побрзај ми на помош!

¹³Да се посрамат и да исчезнат оние што ја клеветат душата моја; да поцрвенат и се засрамат оние, што ми сакаат зло.

¹⁴Јас, пак, секогаш ќе се надевам на Тебе и ќе Те восхвалувам сѐ повеќе.

¹⁵Устата моја ќе ја разгласува Твојата правда, и секој ден спасението од Тебе, зашто не им го знам бројот.

¹⁶Ќе влезам во силата Господова; Господи, ќе ја спомнувам Твојата правда — само Твојата.

¹⁷Боже, Ти ме поучуваше од младоста моја, и јас сѐ досега ги објавував чудесата Твои.

¹⁸И во староста, па и кога ќе престареам, Боже, не напуштај ме, за да ја објавувам мишката Твоја, силата Твоја и правдата Твоја на сегашниот род и на идниот,

¹⁹силата Твоја и правдата Твоја, Боже, дури до вишното небо, и за делата Твои со кои си ме возвеличил, Боже, кој е сличен на Тебе?

²⁰Колку големи и тешки маки ми прати, но Ти пак ме оживуваше, кога Ти се обраќав, и пак ме изведуваше од земните длабини.

²¹Зголемувајќи ги Своите добрини исвртувајќи се кон мене, ме утешуваше и, пак ме изведуваше од земните бездни.

²²И јас ќе ја славам меѓу луѓето на харфа Твојата вистина, Боже мој; ќе Те воспевам на гусла, Светецу Израилев!

²³Ќе се радува устата моја, кога ќе Ти пеам, и душата моја, која си ја избавил.

²⁴И јазикот мој секогаш ќе зборува за Твојата правда, кога ќе поцрвенеат и ќе се засрамат оние, кои ми пожелуваа зло.