Read Lamkang Мудри Соломонови Изреки 16 Bible Online

Мудри Соломонови Изреки 16 - Lamkang bible

Мудри Соломонови Изреки 16

¹Човекот размислува во срцето свое, но одговорот на јазикот е од Господа.

²Сите дела на смирениот му изгледаат дека се исправни, но Господ ги мери душите.

³Предај ги делата свои на Господа, и твоите намери ќе се исполнат.

⁴Господ направи сѐ со определена цел, и за нечесниот — злочест ден.

⁵Секој горделив по срце е одвратност пред Господа: можеш да потврдиш, дека тој нема да остане неказнет. Почетокот на добриот пат е — да се врши правда; тоа е поугодно пред Бога, отколку да се принесуваат жртви. Кој Го бара Господа, ќе најде знаење со правда; оние што навистина Го бараат, ќе најдат мир.

⁶Со милосрдност и правда грев се исчистува, и со страв Господов зло се отстранува.

⁷Кој го бара Господа — тој добива разумност и праведност.

⁸Кој што бара правда — тој ќе добие спокој.

⁹Сите дела Господови се добри, а нечесниот — лош ден го очекува.

¹⁰Во устата на царот има вдахновено слово; неговата уста не смее да греши на суд.

¹¹Точните мерила и тасовите се од Господа; од него се и сите точни мерки.

¹²Незаконско дела е одвратно за царевите, зашто со правда престолот се зајакнува.

¹³Спреведлива уста на царот му е пријатна, и Господ го сака оној, што ја кажува вистината.

¹⁴Царевиот гнев е гласник на смртта; но мудар човек ќе го смилостиви царот.

¹⁵Во светлиот поглед на царот има живот, и неговото благоволение е облак со задоцнет дожд.

¹⁶Да се здобиеш со мудрост е многу подобро, отколку со злато, и да се здобиеш со разум е повеќе за претпочитување отколку одбрано сребро.

¹⁷Патот на праведните е отстранување од злото: патиштата на праведните водат кон долг живот; кои примаат поука — добрини ќе видат, а кои примаат прекори — помудри ќе бидат; кој ги пази своите патишта — душата своја ќе ја запази; кој го сака животот свој — тој внимава што зборува.

¹⁸Пред погибел гордоста врви, и пред паѓање — надуеноста.

¹⁹Подобро е да се смируваш во духот со кротки, отколку да делиш грабеж со горделиви.

²⁰Кој ја води разумно работата своја, добро ќе најде, и кој се надева на Господа, блажен е.

²¹Мудрите по срце, разумни ќе ги наречат, и слаткиот збор го зголемува знаењето.

²²Разумот за оние, што го имаат, е извор на животот, а ученоста на безумниот е зло.

²³Срцето на мудриот го прави јазикот негов мудар, разумнот се пројавува и во устата негова.

²⁴Пријатни зборови се восочен мед: за душата слатки, а за коските лековити.

²⁵Има патишта, кои на човекот му изгледаат прави, но крајот им е пат кон смртта.

²⁶Кој се труди, се труди за себеси, зашто кон тоа устата го упатува; подмолниот во својата уста ја носи својата пропаст.

²⁷Лукав човек зло на себеси прави, во устата своја — оган разгорува.

²⁸Подмолен човек сее раздор, и клеветник пријатели разделува.

²⁹Насилник човек го мами својот ближен и го води кон лош пат;

³⁰замижува со очите, за да измисли подмолност: прекасувајќи си ги усните, извршува зло; тој е оган од злоба.

³¹Староста е венец на славата, таа води по патот на правдата.

³²Долготрпеливиот е подобар од храбриот, и кој владее со себеси, подобар е и од завојувачот на градови.

³³Жреб се фрла во скут, но сѐ што решава тој, од Господа е.