Read Lamkang Мудри Соломонови Изреки 17 Bible Online

Мудри Соломонови Изреки 17 - Lamkang bible

Мудри Соломонови Изреки 17

¹Подобро сув залак и со него мир, отколку куќа полна со заклан добиток, но во раздор.

²Разумен слуга господари над развратник и со браќата ќе го подели наследството.

³Топилницата е за сребро, печката — за злато, а срцата Господ ги испитува.

⁴Лош човек се вслушува во беззакона уста; праведникот лажлива уста не слуша.

⁵Кој се подбива со сиромав, Создателот Му го навредува; кој се радува на зло, нема да остане неказнет, а милосрдниот ќе биде помилуван.

⁶Синовите на синовите се венец на старите, а слава за децата се родителите ниви. Во верникот има огромно богатство, а во неверниот нема ни пара.

⁷На безумен умен збор не му прилега, уште повеќе на големец — лажлива уста.

⁸Дарот е скапоцен камен во очите на оној што го има: каде и да се сврти ќе успее.

⁹Кој ги покрива престапите, бара љубов, а кој одново напомнува за нив, оддалечува дури и пријател.

¹⁰Врз разумниот посилно дејствува прекорот, безумниот — и кога го бијат не чувствува.

¹¹Будалиот бара само зло, затоа жесток ангел ќе биде испратен против него.

¹²Подобро човек на сретне мечка, чии мечиња се грабнати, отколку безумен во неговото безумство.

¹³Кој враќа зло за добро, злото нема да ја напушти куќата негова.

¹⁴Почеток на караницата е како кога водна брана се отвара: отстапи од караницата пред да се разгори.

¹⁵Кој оправдува нечесен и кој обвинува праведен — и обајцата се одвратност пред Господа.

¹⁶Што ќе му се пари во рацете на безумен? За да купи мудрост, но тој нема разум. Кој си прави висока куќа, бара да се сотре, а кој се остранува од учењето, запаѓа во беда.

¹⁷Пријателот сака во секое време и како брат ќе се јави во време на неволја.

¹⁸Малоумен човек дава рака и се залага за ближниот свој.

¹⁹Кој сака караници, го сака гревот, и кој високо ја издига вратата своја, бара да падне.

²⁰Подмолно срце нема да најде добро, и лукав јазик ќе западне во беда.

²¹За таткото на безумен нема радост, а разумниот син ја весели својата мајка.

²²Веселото срце е како лек благотворно, а паднатиот дух коски суши.

²³Не се прави патиштата на нечесните што земаат подароци; нечесните го искривуваат патот на правосудието.

²⁴Мудроста е пред лицето на разумниот, а очите на безумниот се на крајот од земјата.

²⁵Безумен син е мака за таткото и огорчување за мајката.

²⁶Не е добро да го казнуваш правиот, ниту кнезовите да го бијат оној што исправно работи.

²⁷Разумниот е воздржан во зборовите свои, трпеливиот е подобар од оној што бара знаење.

²⁸И безумниот кога молчи за мудар го сметаат, и кој ја затвара устата своја — за разумен го сметаат.