Read Lamkang Мудри Соломонови Изреки 21 Bible Online

Мудри Соломонови Изреки 21 - Lamkang bible

Мудри Соломонови Изреки 21

¹Срцето на царот е во раката на Господа, како водните потоци: Он го насочува, каде што ќе посака.

²Сите патишта на човекот се прави пред очите негови; но Господ ги мери срцата.

³Да ја пазиш правдата и правосудието Му е поугодно на Господа, отколку крвта од жртвите.

⁴Горделивите очи и надуеното срце се светило на грешник, а тоа е грев.

⁵Мислите на трудољубивите се стремат кон изобилие, а секој што пребрзува трпи немаштија.

⁶Богатство добиено со лажлив јазик е суета, која брзо одминува кај оние што ја бараат смртта.

⁷Насилството на нечесните ќе се струполи врз нив, зашто се откажале да го прават она што е добро.

⁸Крив е патот на развратниот човек; а на чистиот постапките му се прави.

⁹Подобро е да живееш во агол под покривот, отколку во заедничка куќа, а со жена кавгаџика.

¹⁰Душата на нечесниот сака зло: во неговите очи нема да најде милост ни пријателот негов.

¹¹Кога го казнуваат подбивачот, простиот станува мудар; и кога мудриот го вразумуваат, тој се здобива со знаење.

¹²Праведниот го набљудува срцето на нечесниот: гледа како нечесните паѓаат во грев.

¹³Кој ги покрива ушите свои пред пискотот на сиромавиот за да не го слуша, и тој самиот ќе пишти, — и нема да го чујат.

¹⁴Таен подарок го стивнува гневот, а дар под рака — и жестоката јарост.

¹⁵Да го пази правосудието е радост за праведникот и страв за оние, што вршат зло.

¹⁶Човек кој скршнал од патот на разумнот, ќе се насели во собранието на мртвите.

¹⁷Кој сака веселби, ќе осиромаши, а кој сака вино и мрс, нема да се збогати.

¹⁸Нечесниот ќе биде откуп за праведниот, и лукавиот — за простодушниот.

¹⁹Подобро да живееш во пуста земја, отколку со жена лута и кавгаџика.

²⁰Скапоцени добра и елеј има во куќата на мудриот, а безумниот човек ги растура.

²¹Кој ја пази правдата и милоста, ќе најде живот, правда и слава.

²²Мудриот влегува во градот на силните и ја соборува силата, на која се надевале нечесните.

²³Кој ја чува устата своја и јазикот свој, ја чува душата своја од зло.

²⁴На дрскиот силник — името му е потсмевач — дејствува со прекумерна дрскост.

²⁵Гладот мрзливиот го убива, зашто рацете негови откажуваат да работат.

²⁶тој секој ден гладува, а праведниот дава и не му е жал.

²⁷Жртвата на нечесните е одвратност пред Господа, зашто ја принесуваат со лукавство.

²⁸Лажниот сведок ќе загине, а човек, кој говори она што знае, ќе говори секогаш.

²⁹Нечесниот човек има дрско лице, а праведниот право оди по патот свој.

³⁰Нема мудрост, нема разум, нема совет — против Господа.

³¹Коњот го подготвуваат за денот на битката, но победата е од Господа.