Read Lamkang Мудри Соломонови Изреки 23 Bible Online

Мудри Соломонови Изреки 23 - Lamkang bible

Мудри Соломонови Изреки 23

¹Кога ќе седнеш да јадеш со силен, гледај добро што има пред тебе,

²и постави ограда на грлото свое, ако си лаком.

³Не се занесувај од вкусните гозби негови: тие се примамлива храна.

⁴Ако си сиромав, не настојувај да трупаш богатство; бегај од таквите мисли.

⁵Ќе ги устремиш очите кон него, о — веќе го нема: тоа ќе си направи крилја и како орел ќе летне кон небото.

⁶Не јади леб кај завидлив човек и не се занесувај од вкусните гозби негови;

⁷зашто какви му се мислите во душата негова, таков е и тој; »јади и пиј« ти вели, но срцето негово не е со тебе.

⁸Залакот, што си го изел, ќе го изблуеш, и убавите зборови свои напразно ќе ги потрошиш.

⁹Во ушите на безумниот не зборувај, зашто тој ќе ги презре разумните зборови твои.

¹⁰Не преместувај стара меѓа и во нива на сираци не влегувај;

¹¹зашто нивниот Заштитник е силен; Он ќе се замеша во делото нивно против тебе.

¹²Управи го срцето свое кон учење и ушите свои — кон умни зборови.

¹³Не оставај го детето без казна: ако го казниш со прачка, тоа нема да умре;

¹⁴Ќе го казниш со прачка, и ќе ја спасиш душата негова од пеколот.

¹⁵Синко, ако твоето срце биде мудро, и моето срце ќе се радува;

¹⁶ќе се радуваат и моите внатрешности, кога твојата уста говори право.

¹⁷Срцето твое нека не им завидува на грешниците, туку биди во сите дни свои во стравот Господов;

¹⁸зашто има иднина, а твојата надеж не е загубена.

¹⁹Слушај, синко, и биди мудар и управувај го срцето свое по прав пат.

²⁰Не биди меѓу оние, што се опиваат со вино, меѓу оние, што се презаситуваат со месо, —

²¹зашто пијаницата, и блудникот и оној што се прејадува, ќе осиромашат, а сонливоста ќе ги облече во партали.

²²Слушај го, синко татка си свој: тој те родил; не ја занемарувај мајка си кога таа ќе остарее.

²³Купувај вистина и не продавај мудрост, учење и разум.

²⁴Праведниот добро го воспитува синот свој; на умниот свој син, му се радува тој.

²⁵Нека ти се радуваат татко ти и мајка ти, нека се радува онаа која те родила.

²⁶Синко, дај ми го мене срцето и очите твои да ги гледаат патиштата мои, —

²⁷зашто блудницата е длабока пропаст, и туѓа жена — тесен кладенец;

²⁸таа како разбојник ги пречекува и ги умножува престапниците на законот меѓу луѓето.

²⁹На некого — ах, на некого — ох, на некого — кавга, на некого жал, на некого рани без причина, на некого зацрвенети очи?

³⁰На оние, што заседнуваат околу вино, кои одат да бараат вино со ароми.

³¹не го гледај виното како се црвенее, какви се искрите во чашата, како убаво се лее;

³²отпосле тоа ќе касне како змија и ќе жилне како отровница;

³³очите твои ќе гледаат туѓи жени, и срцето твое ќе почне да говори развратно;

³⁴и ти ќе бидеш како заспан среде море и како задреман на врв на јарбол,

³⁵па ќе речеш: »Ме биеја, не ме болеше; ме туркаа, не чувствував. Кога ќе се разбудам, пак ќе го барам истото.«