Read Lamkang Мудри Соломонови Изреки 24 Bible Online

Мудри Соломонови Изреки 24 - Lamkang bible

Мудри Соломонови Изреки 24

¹Синко, не завидувај им на лошите луѓе, и не посакувај да бидеш со нив,

²зашто срцето нивно насилство намислува, и устите нивни за лошо зборуваат.

³Со мудрост куќа се изградува и со разум се зацврстува,

⁴а со умешност нејзините простории се исполнуваат со секакви скапоцености и добра.

⁵Мудриот човек е подобар од силниот, а разумниот — од оној што има голем имот.

⁶Затоа со обмислување се води војна, а успех ќе има со многу советувања.

⁷Пред вратите на мудрите има мудрост и добра мисла; мудрите не се оддалечуваат од законот на Господа.

⁸Кој мисли да направи зло, ќе го наречат лош човек.

⁹Безумниот умира во гревови; нечистотата негова го убива.

¹⁰Ако во злочест ден си се покажал слаб, скудна ти е силата.

¹¹Спасувај ги оние што ги водат на смрт, и оние што сакаат да ги убијат, не откажувај се од нив.

¹²Ако кажеш: ‚ете, ние не го знаевме тоа?‘ А Оној, Кој ги испитува срцата, зар не знае? Оној, Кој бдее над душата твоја, го знае тоа и ќе му даде на човекот според делата негови.

¹³Јади, синко, мед, затоа што е пријатен, и јади восочен мед, кој е сладок за грлото твое:

¹⁴такво е за душата твоја и познавањето на мудроста. Ако си ја нашол, имаш иднина, а твојата надеж нема да те остави.

¹⁵Не помислувај зло, безбожниче, против живеалиштето на праведниот, не опустошувај го местото на спокојство негово,

¹⁶зашто седумпати ќе падне праведник — и пак ќе стане; а падне ли нечесен, тој изнемогнува во злото.

¹⁷Немој да се радуваш, кога непријателот твој ќе падне, и срцето твое да не се весели, кога тој ќе се сопне.

¹⁸Инаку, Господ ќе види, и тоа пред очите Негови нема да биде угодно, и Он ќе го оттргне од него гневот Свој.

¹⁹Не лути се поради зломисленици и не завидувај им на безбожниците,

²⁰зашто лошиот нема потомство; и светилото не нечесните ќе згасне.

²¹Бој се, синко, од Господа и до царот; не востанувај ни против едниот ни против другиот,

²²оти неочекувано ќе дојде казната од нив, — а кој е тој што ќе ја предосети пропаста до нив двајцата?

²³Кажано е од мудрите: не е добро во судот да има пристрастност.

²⁴Кој му вели на виновниот: ‚прав си‘, него народите ќе го проколнуваат, него племињата ќе го мразат;

²⁵а кои разобличуваат, ќе бидат сакани, и врз нив ќе дојде благословот.

²⁶Во устата бакнува оној, кој изговара зборови чесни.

²⁷Уреди ги работите надвор од куќата, сврши ги на нивата своја, а потоа гради го домот свој.

²⁸Не сведочи лажно против ближниот свој: зошто да лажеш со устата своја?

²⁹Не вели: ‚Како ми направи тој мене, така и јас ќе му направам нему: ќе му се одмаздам за навредата што ми ја нанесе.‘

³⁰Минував покрај нивата на мрзлив човек и покрај лозје на малоумен човек:

³¹и ете, сѐ беше обраснато со трње, нивата беше покриена со коприва, а камената ограда негова беше урната.

³²И погледнав, го устремив срцето свое, погледнав и поука извлеков:

³³‚малку ќе поспиеш, малку ќе задремеш, малку со скрстени раце, ќе полежиш —

³⁴и сиромаштијата ќе ти дојде како брзоодец, и немаштијата твоја — како вооружен човек.‘