Read Lamkang Мудри Соломонови Изреки 28 Bible Online

Мудри Соломонови Изреки 28 - Lamkang bible

Мудри Соломонови Изреки 28

¹Нечесниот бега, кога никој не го гони; а праведниот е смел како лав.

²Кога земјата ќе отстапи од законот, тогаш во неа има многу началници; а при разумен и вешт маж управата е долговечна.

³Човекот сиромав што врши зло на слабите и исто како излеан дожд, од кој полза нема.

⁴Отстапниците од законот ги фалат нечесните, а оние што Го бараат Господа, негодуваат против нив.

⁵Лошите луѓе не ја разбираат справедливоста, а оние, што го бараат Господа, разбираат сѐ.

⁶Подобро сиромав, кој оди во својата непорочност, отколку оној, што ги искривува своите патишта, макар и да е богат.

⁷Кој го пази законот, е разумен син, а кој се дружи со расипници, го срами татка си.

⁸Кој го умножува имотот свој преку нечесност и лихва, тој го собира за добротворецот на сиромасите.

⁹Кој го отстранува увото свое да не го слуша законот, на таквиот и молитвата му е одвратна.

¹⁰Кој ги упатува праведните кон патот на злото, сам ќе падне во јамата своја, а непорочните ќе наследат добро.

¹¹Богатиот човек се смета за мудрец, меѓутоа, умен сиромав ќе го разобличи.

¹²Кога праведници победуваат, голема е славата, но кога нечесните се издигаат, луѓе гинат.

¹³Кој ги крие престапите свои, нема да напредува; а кој се освестува и ги остава, ќе биде помилуван.

¹⁴Блажен е оној човек, кој секогаш се бои; а кој го ожесточува срцето свое, ќе падне во неволја.

¹⁵Лав што рика и мечка гладна, тоа е нечесниот властодржец над беден народ.

¹⁶Неразумен управител врши многу угнетувања, а кој го мрази користољубието, ќе има долги дни.

¹⁷Човекот, виновен за пролевање на човечка крв, бега до гроб, за да не го фати некој. Казнувај го синот твој, и ќе те засака: ќе ја весели твојата душа; нема нечесните да ги слуша.

¹⁸Кој оди непорочно, ќе биде неповреден; а кој оди по криви патишта, ќе падне на еден од нив.

¹⁹Кој си ја обработува земјата, ќе се наситува со леб, а кој е мрзлив и не работи, ќе се насити со сиромаштија.

²⁰Верен човек ќе биде многу благословуван, а кој бара да се збогати, не останува без казна.

²¹Не е добро кога некој не се срамува од праведните: таков човек и за парче леб ќе изврши неправда.

²²Завидлив човек брза кон богатството и не мисли, дека сиромаштијата ќе го стигне.

²³Кој разобличува човек, отпосле ќе најде поголема благонаклоност, отколку оној, што му ласка со јазикот.

²⁴Кој го краде татка си и мајка си и вели: »тоа не е грев« тој им е соучесник на грабителите.

²⁵Гордиот се надева на себеси, безумен е; а кој постапува мудро, ќе биде спасен.

²⁶Кој се надева на себеси, безумен е; а кој постапува мудро, ќе биде спасен.

²⁷Кој дава на сиромав, нема да осиромаши; а кој ги крие очите од него, ќе биде проколнуван.

²⁸Кога нечесните се издигаат, луѓето се кријат, а кога паѓаат, праведниците се умножуваат.