Read Lamkang Мудри Соломонови Изреки 30 Bible Online

Мудри Соломонови Изреки 30 - Lamkang bible

Мудри Соломонови Изреки 30

¹Зборовите на Агура, син Јакеов, од Маса; негово пророштво, кажано на Итила, за Итила и Укала.

²Навистина, јас сум понеук од кого и да било меѓу луѓето, и во мене нема разум човечки,

³Бог ме научи на премудрост и ја разбрав разумноста на светиите.

⁴Кој се искачил на небото и слегол оттаму? Кој собрал ветар во пазувата своја? Кој врзал вода на наметката своја? Кој ги поставил сите краишта на земјата? Како му е името? И кое е името на синот негов? Знаеш ли?

⁵Секој збор од Бога е чист; Он му е штит на оној, што се надева на Него.

⁶Не додавај кон зборовите Негови, за да не те разобличи, и да не излезеш лажливец.

⁷За две работи те молам; не ми откажувај пред да умрам:

⁸суетата и лагата оддалечи ги од мене, сиромаштија и богатство не ми давај, — храни ме со насушниот леб,

⁹та, откако ќе се пренаситам, да не се откажам од Тебе и да кажам: »Кој е Господ« и, откако ќе осиромашам, за да не почнам да крадам и да го употребува името на мојот Бог напразно.

¹⁰Не клевети го слугата пред господарот негов, за да не те проколне, и ти да останеш виновен.

¹¹Лошото чедо високо ги држи очите свои, и толку се кренати клепките негови!

¹²Лошото чедо се смета за чисто, а не е измиено од нечистотиите свои.

¹³Лошото чедо високо ги држи очите свои, и толку се кренати клепките негови!

¹⁴Лошото чедо има заби како мечеви, а катниците негови се како ножеви, за да ги изедува сиромасите по земјата и немоќните меѓу луѓето.

¹⁵Пијавицата има две ќерки кои велат »Дај, дај!« Има три работи ненаситни и четири што не велат »Доволно.«

¹⁶Тое се: пеколот и утробата неплодна, земјата, која не се наситува со вода, и огнот, кој не вели: »доста!«

¹⁷Око, кое му се потсмева на татка си и не сака да се покорува на мајка си, кое ќе биде исколвано од долински гаврани и од орлови пилци изедено!

¹⁸Тие работи се недостижни за мене, а четвртата, не ја ни разбирам:

¹⁹патиштата на орелот по небото, ползењето на змијата по карпите, патеките на коработ среде море и патот на маж во младоста негова.

²⁰Таков е патот и на жена прељубница: се најала и ја избришала устата своја, па вели: »ништо лошо не сум направила.«

²¹Од три работи се тресе земјата, а четвртата не може да ја поднесе:

²²од слуга, кога ќе стане цар; од безумен, кога до наситување ќе се најаде со храна,

²³од распуштена жена, кога ќе се омажи, и од слугинка, кога го зазема местото на господарката своја.

²⁴Има четири мали животни на земјата, но тие се помудри и од мудреците:

²⁵мравките — во кои нема сила, но лете сепак си ја приготвуваат храната;

²⁶јазовците — иако слаби животни, но ги прават куќите свои во камен;

²⁷скакулците, кои немаат цар, но излегуваат во војна сите во редови;

²⁸пајакот, кој со раце се лови, но се наоѓа и во царските палати.

²⁹Еве три, коишто убаво чекорат, и четвриот, кој свечено настапува:

³⁰лавот, најсилен меѓу ѕверовите, кој нема да се врати и да се исплаши од никого;

³¹и петелот кој надуено шета меѓу кокошките; како царот меѓу својот народ.

³²Ако гордоста те тера на безумни дела и си намислил зло, стави ја раката на устата своја.

³³Зашто, како кога се бие млеко, се добива масло, кога ќе се удри носот, потечува крв, така и кога се предизвикува гнев, произлегува кавга.