Read Lamkang Мудри Соломонови Изреки 31 Bible Online

Мудри Соломонови Изреки 31 - Lamkang bible

Мудри Соломонови Изреки 31

¹Зборовите на царот Лемуил, со кои го поучила неговата мајка.

²Што, што сине на утробата моја? Тебе ти говорам, сине мој, првенец, чедо на моите молитви.

³Не им го давај на жени татковството свое, ниту патиштата на оние од нив, кои цареви погубуваат. Светувај се пред на направиш нешто.

⁴Не е за царевите, Лемуиле, не е за царевите вино да пијат, ниту за кнезови — сикер,

⁵за да не го заборават, откако ќе се опијат, законот и да ја искривуваат правдината на угнетените.

⁶Дајте му сикре на оној што е ожалостен; вино нека пијат оние што се болни.

⁷нека пивне тој за да ја заборави сиромаштијата своја и да не ги чувствуваат веќе болките свои.

⁸Синко, отворај ја устата своја за слава Божја и на сите суди им по правда.

⁹Отворај ја устата своја и праведно суди, и заштитувај ги и сиромавиот и немоќниот.

¹⁰Кој ќе најде жена добродетелна? Таа е поскапа и од најскапоцените камења.

¹¹Срцето на мажот нејзин е убедено во неа, тој нема да остане без добивка;

¹²таа ќе му прави добро на мажот свој, во сите дни од животот негов.

¹³Набавува волна и лен, и весело работи со рацете свои.

¹⁴Таа е како трговски кораб, — оддалеку си донесува храна.

¹⁵Таа станува уште преку ноќта и дава храна во куќата своја и им определува работа на слугинките свои.

¹⁶Ќе помисли ли за нива, ја купува; од плодот на рацете свои си насадува лозје.

¹⁷Ја препашува со сила половината своја и ги зацврстува мишките свои за работа.

¹⁸Таа гледа колку е добро што работи, и светилката нејзина не се гасне ноќе.

¹⁹Ги протега рацете кон фурката, и прстите нејзини се фаќаат за вретеното.

²⁰Дланката своја му ја отвора на сиромав, и раката своја на оној, кој има нужда, му ја подава.

²¹Не се плаши од студ за челадта своја, зашто сета челад нејзина е облечена во двојни алишта.

²²Таа си ткае покривачи; он висон и пурпур е нејзината облека.

²³Мажот нејзин е познат кај портите, кога седи со старешините на земјата.

²⁴Таа работи покривки и ги продава, на Финикијците и појаси на Хананејците.

²⁵Здравје и убавина е нејзината облека, и весело гледа на иднината.

²⁶Со мудрост ја отвора устата своја, и кротка поука има на јазикот нејзин.

²⁷Го надгледува домаќинството свое и не јаде леб во леност.

²⁸Стануваат децата и ја ублажуваат, — мажот, и тој ја фали:

²⁹»многу жени добродетелни имало, многу од нив стекнале богатство и сила, но ти ги надмина сите.«

³⁰Миловидноста е примамлива и убавината — суетна; но жена, која се плаши од Господа, е достојна за пофалба.

³¹Дајте ѝ од плодовите на нејзините раце, и нека се прославува при мажот нејзин, при градските порти!