Read Lamkang Мудри Соломонови Изреки 6 Bible Online

Мудри Соломонови Изреки 6 - Lamkang bible

Мудри Соломонови Изреки 6

¹Синко, ако си зел одговорност за твојот ближен и си ја дал раката своја за друг,

²ти си се врзал со зборовите на устата своја, фатен си со зборовите на својата уста.

³Затоа направи, синко еве што, за да се избавиш, бидејќи, си паднал во рацете на својот ближен: оди, падни пред нозете на блискиот свој и моли го;

⁴не им давај сон на очите твои и дремка на клепките свои,

⁵спасувај се како срна од стапица и како птица од мрежа.

⁶Оди кај мравката, мрзливче, види ја нејзината работа и биди мудар.

⁷Таа нема ниту началник, ни настојник, ниту заповедник;

⁸но ја приготвува храната лете, ја собира во време на жетва храната своја. Или оди кај пчелата и види, колку е трудољубива, каква пофална работа врши; трудот нејзин го употребуваат за здравје и царевите и обичните луѓе; неа сите ја сакаат, и таа е славна; иако по силата е слаба, но по мудроста е почитувана.

⁹До кога, мрзливче ќе спиеш? Кога од сонот ќе станеш?

¹⁰малку ќе поспиеш, малку ќе подремеш, малку со скрстени раце ќе полежиш:

¹¹и ќе дојде сиромаштијата твоја како патник, и немаштијата твоја како разбојник. Ако, пак, не бидеш мрзелив, жетвата твоја ќе дојде како извор, а скудноста ќе избега далеку од тебе.

¹²Човек лукав, човек нечестив со лажлива уста,

¹³намигнува со очите, говори со нозете, дава знаци со прстите,

¹⁴во срцето негово има подмолност: тој мисли зло во секое време, сее раздори.

¹⁵Затоа ненадејно ќе дојде неговата пропаст, наеднаш ќе биде сотрен — без излекување.

¹⁶Еве шест работи, кои Господ ги мрази — дури седум, што му се одвратни на душата Негова:

¹⁷очи горделиви, јазик лажлив и раце, што пролеваат невина крв,

¹⁸срце кои крои лоши планови, нозе, кои брзо трчаат кон зло,

¹⁹лажен сведок, кој измислува лаги, и оној, што сее раздор меѓу браќа.

²⁰Синко, пази ја заповедта на татка си и не отфрлај поуката на мајката своја;

²¹врзи ги засекогаш за срцето свое, врзи ги околу вратот свој.

²²Ако тргнеш, тие ќе те раководат; ако легнеш да спиеш, ќе те пазат, ако се разбудиш, ќе разговараат со тебе;

²³зашто заповедта е светило, и поуката — светлина, а опомената — пат кон животот,

²⁴за да те пазат од расипана жена, од ласкав јазик на туѓа.

²⁵Не ја посакувај убавината нејзина во срцето свое, за да не бидеш уловен преку очите свои и да не те вовлече со трепките свои,

²⁶зашто поради жена блудница човекот паѓа до корка леб, а жена прељубодејка уловува многу чесна душа.

²⁷Може ли некој да носи оган во гради, а да не се запали облеката негова?

²⁸Може ли некој да оди по вжарени јаглења, а да не ги изгори нозете свои?

²⁹Истото тоа станува и со оној, кој влегува кај жена на ближниот свој; кој и ќе се допре до неа, нема да остане без вина.

³⁰Не му проштеваат на крадецот, ако краде за да си ја насити душата, кога е гладен;

³¹ако го фатат, тој плаќа седумпати повеќе, го дава целиот свој имот.

³²Кој, пак, врши прељуба со прељубница, тој нема ум; си ја погубива душата своја, оној што врши тоа;

³³биење и срам ќе најде тој, и бесчестието негово нема да се избрише,

³⁴зашто љубомората е јарост на мажот, и во денот на одмаздата своја — тој не ќе знае за милост,

³⁵нема да прими никаков откуп и нема да се задоволи ни со многу подароци.