Read Lamkang Мудри Соломонови Изреки 7 Bible Online

Мудри Соломонови Изреки 7 - Lamkang bible

Мудри Соломонови Изреки 7

¹Синко, пази ги зборовите мои, и сокриј ги во тебе заповедите мои. Синко, почитувај Го Господа, — и ќе се зацврстиш и, освен од Него, не се плаши од никого.

²Пази ги заповедите мои, и ќе живееш; пази го и учењето мое, како зеницата на очите свои.

³Врзи ги на прстите свои, напиши ги на плочите од срцето свое.

⁴Кажи ѝ на мудроста: »Ти си ми сестра!« — и наречи го разумот твој роднина,

⁵за да те пазат од жената на друг, од туѓа, која ги засладува зборовите свои.

⁶Ете, еднаш гледав од прозорецот на куќата моја, низ мојата решетка,

⁷и видов меѓу неискусните, забележав меѓу младите едно неразумно момче,

⁸кое минуваше преку плоштадот близу до нејзиниот агол и кое одеше по патот кон нејзината куќа,

⁹квечерина кога се стемнуваше, во ноќната темнина и во мракот.

¹⁰И ете, во пресрет му доаѓа жена, наконтена како блудница, со подмолно срце,

¹¹зборлива и нескротлива, нозете нејзини не се запираат в куќи:

¹²де на улицата, де по плоштадите и на секој агол поставува стапици.

¹³Таа го зграпчи, го бакна и со бесрамно лице му зборуваше:

¹⁴»Мирна жртва имам денес: денес го исполнив планот свој;

¹⁵затоа и излегов да те пресретнам, за да те побарам, и те најдов;

¹⁶со килими го украсив леглото свое, со разнобојни покривки египетски;

¹⁷леглото свое го попрскав со смирна, алој и дарчин;

¹⁸дојди, ќе се насладуваме со љубовта дури до зори, дојди да се радуваме во милување,

¹⁹зашто маж ми не е дома: тој замина на долг пат;

²⁰една кеса сребро зеде со себеси; ќе си дојде дома кон полната месечина.«

²¹Со многу ласкави зборови таа го привлече, со меката уста своја го овладеа.

²²Тој веднаш тргна по неа, како што вол оди на колење и како куче — на верига, како елен — на истрел,

²³додека стрела не му го пробие црниот дроб, како птичка што се фрла во стапица, а не знае дека е таа за нејзина погибел.

²⁴И затоа, синко, послушај ме и внимавај на зборовите од устата моја.

²⁵Да не скршнува срцето твое по нејзиниот пат, да не талка по патеките нејзини,

²⁶зашто таа многумина смртно ранила, и многумина јунаци таа убила.

²⁷Нејзиниот дом е пат кон пеколот, кој води во внатрешните живеалишта на смртта.