Read Lamkang Песна над песните 1 Bible Online

Песна над песните 1 - Lamkang bible

Песна над песните 1

¹Да, сакам да ме целиваш со бакнежи на устата своја! Зашто твоите милувања се подобри од виното.

²Од пријатниот мирис на твоите масла името ти е како разлеано миро; затоа те сакаат момите.

³Поведи ме, да побрзаме; царот ме воведува во одаите свои, — ќе се восхитуваме и ќе се радуваме со тебе, ќе ги фалиме твоите милувања повеќе од вино. Навистина те сакаат!

⁴Ќерки ерусалимски, црна сум но сепак сум убава како шаторите кидарски, како Соломоновите завеси.

⁵Не гладајте ме оти сум црномурна, зашто сонцето ме подгорело: мајчините синови ѝ се налутија, ме поставија да ги чувам лозјата — но своето сопствено лозје не го зачував.

⁶Кажи ми ти, кого го сака душата моја: каде го пасеш стадото, каде пладнуваш? Зошто да бидам како скитник крај стадата околу твоите другари?

⁷Ако не го знаеш тоа, о, најубава меѓу жените, тогаш оди си по овците свои и паси ги јарињата покрај пастирските шатори.

⁸Ти си ми, драга моја, како кобилка во фараонова двоколка.

⁹Прекрасни се твоите образи под обетките, вратот твој — со ѓерданите;

¹⁰Ќе ти направам златни обетки со сребрени топчиња.

¹¹Додека царот беше крај трпезата, народот мој го испушташе својот пријатен мирис.

¹²Смирнова китка е мојот возљубен: стои меѓу градите мои.

¹³Мојот возљубен ми е како кипарисов грозд во Енгедските лозја.

¹⁴О, убава си, мила моја, убава си! Имаш очи гулабови.

¹⁵О, убав си, мил мој, прекрасен си! И постелата наша се зеленее.

¹⁶Покривите на куќите ни се кедри, штиците наши — кипариси.