Read Lamkang Песна над песните 6 Bible Online

Песна над песните 6 - Lamkang bible

Песна над песните 6

¹Каде отиде твојот возљубен, о, најубава меѓу жените? Каде скришна твојот возљубен? Ние ќе го побараме со тебе.

²Мојот возљубен отиде во градината своја, во ароматните цветници, за да пасе во градината и да бере кринови.

³Јас му припаѓам на мојот возљубен, а мојот возљубен мене; тој пасе меѓу криновите.

⁴Убава си, мила моја, како Тирса, прекрасна — привлечна како Ерусалим, страшна како војска со знамиња.

⁵Тргни ги очите од мене, зашто ме збунуваат.

⁶Косата ти е како стадо кози, кога слегуваат од Галад; забите ти се како стадо овци, кога излегуваат од капење, од кое секоја е со по две јагниња, и јалова меѓу нив нема,

⁷твоите образи под превезот твој се како две половинки од калинка.

⁸Има шеесет царици, осумдесет наложници и безброј моми,

⁹но единствена е таа, гулабицата моја, совршената моја; единствена е таа на мајка си, избрана кај родителката своја. Ја видоа момите, и ја возвеличија, ја видоа и цариците возљубената, и ја пофалија.

¹⁰»Која е таа, што болска како зора, убава како месечина, светла како сонце, страшна како војска со знамиња?«

¹¹Слегов во ореовата градина да погледнам зелена долина, да видам дали се развила лозата, дали процутеле калинките. Таму ќе ти ги дадам усните мои.

¹²Не знам, како душата да ме влече кон колите на големците од мојот народ.