Read Lamkang Мудрост Соломонова 13 Bible Online

Мудрост Соломонова 13 - Lamkang bible

Мудрост Соломонова 13

¹Сите луѓе по природа се суетни, оние кои не Го познавале Бога, Кој постои од вечноста и, гледајќи ги Неговите дела, не Го познавале Него Создателот,

²туку ги почитувале за богови кои управуваат со светот: или огнот, или ветрот, или подвижниот воздух, или ѕвездениот круг, или силните води или небеските светила.

³Зашто восхитувајќи се на нивната убавина, тие сили ги почитуваа за богови, а тие требаше да познаат колку е Господ подобар од нив, за Што Он, Создателот на убавото — ги создал и нив.

⁴Ако, пак, се чудеа на силата нивна и на нивното дејство, тие требаше од нив да разберат колку е посилен Оној, Кој нив ги создал,

⁵бидејќи според величината и убавината на созданијата по сличност ќе се познае Создателот на нивното битие.

⁶Но, сепак тие заслужуваат помал прекор, зашто можеби се заблудуваат, барајќи Го Бога, па сакаат да Го најдат,

⁷оти свртувајќи се кон Неговите дела, тие испитуваат и се убедуваат преку своите очи, дека сѐ видливо е прекрасно.

⁸Но сепак не треба да им се прости.

⁹Оти, ако можеле да придобијат толкаво знаење, така што можеле да го проучуваат привремениот свет, зошто тогаш веднаш не Го нашле неговиот Господар?

¹⁰Но, понеспокојни се оние што својата надеж ја полагаат на бездушни работи, кои делата на човечки раце ги нарекуваат богови — златото и среброто, уметнички обработени образи ѝ аживотни или безвреден камен, изделкан од човечка рака.

¹¹Или, пак, дрводелец некој отсече погодно дрво, грижливо му ја симне целата кора и, откако го изработи убаво, од него направи сад за неаква корисна употреба во животот,

¹²а деланките од работата ги употреби за готвење храна и потоа се нахрани,

¹³но една од тие гранки, негодна за ништо, криво дрво и глуждливо, го зема и во слободното време го изделкува со опитност вешта, па сличен го направи на човечки лик,

¹⁴или го направи да личи на некое долно животно, го премачкува со оловна боја, потоа со црвена, му отстранува секој недостаток,

¹⁵и, откако приготви погодно за него место, го закачува на ѕидот, прицврстувајќи го претходно со железо.

¹⁶И така, за да не падне неговото дело, однапред се грижи за него, бидејќи знае дека тоа самото не може да си помогне, зашто е идол и има потреба од помош.

¹⁷А молејќи се пред него за својот имот, за женидба и деца, тој не се срамува да му говори на тоа дрво што е бездушно,

¹⁸и да бара здравје од она што е неможно, од мртвото — да бара живот, и помош да бара од она што е беспомошно, да го моли за добро патување она што не може да пречекори,

¹⁹за придобивка, за работа и за успех на рацете, кое воопшто не може со раце да работи, за сила да го моли — најбессилното.