Read Lamkang Мудрост Сирахова 12 Bible Online

Мудрост Сирахова 12 - Lamkang bible

Мудрост Сирахова 12

¹Вистински и лажни пријатели. Кога правиш добро, знај кому му го правиш, и ќе ти благодарат за твоите добрини.

²Прави му добро на побожниот и награден ќе бидеш; ако не од него — од Севишниот.

³Нема добро за оној кој постојано прави зло и за оној што милостиња не дава.

⁴Давај му на побожниот; на грешниот не помагај.

⁵Прави му добро на смирениот, не давај му ништо на безбожниот, леб не давај му, за да не стане посилен од тебе.

⁶Тој ќе ти плати за твоето добро со двојно зло; Севишниот ги отфрла грешниците и им се одмаздува на безбожниците.

⁷На добриот давај му; грешник не помагај.

⁸Пријателот во добро не се познава, а во злото непријателот не може да се сокрие.

⁹Кога ни е добро — непријателите се тажни, а кога сме во зло — и пријателите бегаат од нас.

¹⁰На непријателот не верувај му никогаш, зашто неговата злоба е слична на бакар покриен со патина;

¹¹и кога е смирен, и кога наведнат оди, пази ја од него душата своја и ќе бидеш пред него како огледало чисто: ќе видиш дека од отровната патина не е очистен до крај.

¹²Не ставај го до тебе, за да не те истурка и местото твое да го заземе; не ставај го од твојата десна страна, за да не ти го земе твоето место. Најпосле ќе ги разбереш моите зборови; со тага ќе си спомнуваш за поуките мои.

¹³Кој ќе се сожали над змијарот што змија го каснала и над оние што на ѕверови диви се приближуваат? И оној што со грешник се дружи — во неговите гревови учествува.

¹⁴Додека цврсто стоиш тој не се открива, но кога еднаш ќе паднеш, — веднаш ќе те нападне.

¹⁵На непријателот зборовите се слатки, а во срцето смислува в бездна да те турне; во очите свои солзи ќе има, а кога ќе може — ни крв не го заситува.

¹⁶А снајде ли те зло, тој таму е пред тебе:

¹⁷и како да ти помага, нога ќе ти подметне.

¹⁸Ќе врти со глава, ќе крши раце, ќе негодува и ќе го менува лицето.