Read Lamkang Мудрост Сирахова 18 Bible Online

Мудрост Сирахова 18 - Lamkang bible

Мудрост Сирахова 18

¹Божјото величие. Сѐ создал Оној Кој живее вечно; само Господ е праведен.

²Никому не му дал делата Негови да ги објаснува.

³Кој може големите Негови дела да ги испитува?

⁴Кој може на величието Негово да ја измери силата? Кој може неговите милости да ги искаже?

⁵Не можно е да се намалат, ниту е можно да се зголемат; никој не може да ги испита чудесните дела Божји.

⁶Кога човекот помисли дека нешто завршил, тоа е само почеток, а штом престане — збунет е како и секогаш.

⁷Што е човекот и зошто е? Што е неговото добро, а што неговото зло?

⁸Деновите на човекот се многу ако се сто години, а според вечноста — тие се како капка вода или зрно песок во морето.

⁹Затоа спрема луѓето Господ е долготрпелив, ги опсипува со своите милости.

¹⁰Тој гледа и знае колку е беден нивниот крај.

¹¹Затоа толку многу им простува.

¹²Милоста на човекот е само спрема неговиот ближен, а милоста божја — за сѐ што е живо.

¹³Господ прекорува и вразумува, поучува и обрнува, како пастирот стадото свое.

¹⁴Милостив е спрема оние што се вразумуваат и спрема оние кои ревносно се враќаат кон законот Негов.

¹⁵Синко, добрите дела твои не врши ги со прекор, и подароците твои не давај ги со навредливи зборови.

¹⁶Росата нели ја освежува жегата? Поскапоцен е зборот од самото дело.

¹⁷Не е ли зборот подобар од добриот дар? А добродетелниот човек го има и едното и другото.

¹⁸Глупавиот немилосрдно прекорува, а дарот од завидливиот очите ги суши.

¹⁹Помисли пред да проговориш, грижи се за себе пред да се разболиш.

²⁰Сам испитувај се пред да ти судат; во часот на посетата Божја ќе бидеш помилуван.

²¹Смири се пред да се разболиш; а кога си згрешил — покај се.

²²Ништо да не ти пречи заветот да го исполниш на време, не одлагај пред самата смрт да се оправдаш.

²³Пред да почнеш да се молиш, приготви се; не биди како човек кој Господа Го искушува.

²⁴Мисли на гневот во смртниот час и на часот на одмазда — кога Бог лицето Свое го свртува.

²⁵Во време на изобилие помисли и на глад, а во времето кога си богат — на сиромаштијата и немаштија.

²⁶Од утро до вечер времето се менува; пред Господа сѐ брзо одминува.

²⁷Мудриот човек во сѐ претпазлив ќе биде; во деновите на гревови од безгрижност ќе се пази.

²⁸Секој којшто е разумен мудроста ја препознава и ќе го почитува оној што ја придобил.

²⁹Оние што ги сфаќаат мудрите зборови, и сами стануваат мудри; па и другите со мудроста ги опсипуваат.

³⁰Не оди по твоите страсти, скратувај ги твоите грешни желби.

³¹Ако ги задоволуваш грешните желби на својата душа ќе те направи за подбив пред твоите непријатели.

³²Во раскошен живот не барај радост; не приврзувај се за гозби срамни.

³³Гледај да не осиромашиш, гостејќи се со позајмени пари — кога ништо немаш во твоето ќесе.