Read Lamkang Мудрост Сирахова 19 Bible Online

Мудрост Сирахова 19 - Lamkang bible

Мудрост Сирахова 19

¹Вистинска и лажна мудрост. Работник пијаница нкогаш нема да се збогати, а оној што ги презира малите работи, набргу и без нив ќе остане.

²Виното и жените ги расипуваат и разумните луѓе, а кој се врзува со блудница — ќе загуби секаков срам.

³Гниењето и црвите ќе го наследат; неразумната душа ќе биде погубена.

⁴Лесномислен е оној што брзо се доверува, а кој греши — греши против својата душа.

⁵Кој ужива во злото казнет ќе биде, а кој им се противи на грешните желби — тој животот свој ќе го овенча.

⁶Кој јазикот свој го воздржува — мирно ќе живее, а кој мрази мрморење, злото го прогонува.

⁷Не повторувај ги зборовите што ти се доверени, и ништо нема да ти недостасува.

⁸Не доверувај ништо ни на пријател ниту на непријател; ако тоа не е грев за тебе — не откривај го;

⁹зашто оној што ќе те ислуша ќе се припазува од тебе, а по извесно време и ќе те намрази.

¹⁰Ако слушнеш нешто, нека умре во тебе; биди како гроб. Не плаши се! Нема да те раскине.

¹¹Кога неразумниот нешто слушне, го обземаат болки — како родилка при породување на младенец.

¹²Како што е стрелата забодена во бедро, таков е и зборот во срцето на неразумниот.

¹³Прашај го твојот пријател, можеби не го направил тоа; а, ако го направил, да не го прави во иднина.

¹⁴Прашај го пријателот: можеби не рекол ништо, а ако рекол, да не го повторува во иднина.

¹⁵Прашај го пријателот твој, зошто често има клеветење.

¹⁶На секој збор не верувај.

¹⁷Некој греши со зборови, но не и со душа; а кој не згрешил со својот јазик?

¹⁸Распрашај го соседот твој пред да го заплашуваш; дај му место и на законот на Севишниот. Секоја мудрост е Господен страв; секоја мудрост е извршување на законот.

¹⁹Не е мудрост да знаеш да правиш лошо; на собирот од грешници — разумност нема.

²⁰Има итрина и таа е одвратна; луд е оној што мудрост нема.

²¹Подобро е сиромашен со знаење, но со Господен страв, отколку богат со знаење, а да го прекршува Законот.

²²Има лукава итрина во служба на неправдата, има и изопачување на вистината — корист да се добие.

²³Има човек што оди подгрбавен и натажен, но однатре е полн со подмолност;

²⁴го наведнал лицето и се прави глув, но тој ќе те измами и кога не мислиш.

²⁵Ако немоќта му попречила да згреши, но, штом можноста му се даде — ќе ти направи зло.

²⁶Човек се познава по изгледот и по изразот на лицето разумниот го познаваме.

²⁷Облеката, смеењето и начинот на одење покажуваат каков е човекот.

²⁸Има прекор што не е навреме; а има и таков што може да се премолчи — и тоа е благоразумно.