Read Lamkang Мудрост Сирахова 20 Bible Online

Мудрост Сирахова 20 - Lamkang bible

Мудрост Сирахова 20

¹Неприлични зборови. Многу е подобро да изобличиш, отколку тајно да се лутиш; а кој насамо изобличува, од штета ќе се претпази.

²Колку е убаво кога изобличениот се покае!

³Зашто таквиот ќе избегне драговолен грев.

⁴Каков што е евнухот што сака девица да обесчести, таков е и оној што сака правда преку суд со насилство.

⁵Некој молчи и се покажува мудар; а некого го мразат поради многу зборување.

⁶Некој молчи, зашто нема што да одговори, а некој молчи, чекајќи го својот час.

⁷Мудар човек молчи до вистинскиот час, а суетниот и неразумниот не чекаат време.

⁸Кој премногу зборува, здодевен станува, а кој си присвојува право да говори, — намразуван бива.

⁹Некој во злото добро наоѓа, а некогаш придобивката загуба станува.

¹⁰Има подрок што не ти е корисен, а има и дар што двојно се исплатува.

¹¹Има понижување за слава, а некој од понижување крева глава.

¹²Некој со малку купува многу, а сепак плаќа за него седумпати повеќе.

¹³Мудриот го сакаат заради неговите зборови, а љубезноста на неразумните е празна.

¹⁴Дар од безумен не ти е на корист; зашто неговите очи бараат многу повеќе за враќање;

¹⁵Тој малку дава, а многу зборува: ќе отвори уста, ќе кажува на сите. Денес на заем дава, а утре го бара она што го дал. Ваквиот човек е омразен и пред Бога и пред луѓето.

¹⁶Неразумниот вели: »Немам пријател, нема благодарност за добрините што ги правам; лебот мој го јадат, но со јазикот се лукави.«

¹⁷Колкупати и колкумина со него се подбиваат!

¹⁸Подобро да се препнеш на патот, отколку со јазикот. И така ненадејно пропаста на лошите им доаѓа.

¹⁹Непријатниот човек е ненавремена приказна, која е секогаш во устата на неуките.

²⁰Мудрата изрека е одвратна во устата на глупавиот, зашто ја кажува кога не треба.

²¹Некој се воздржува од грев поради сиромаштија, и во воздржувањето не се смирува.

²²Некој ја загубува својата душа поради лажна срамежливост, ја загубува од лицемерност пред безумен.

²³Некој од срам на пријателот ветување му дава; и така без потреба непријател го прави.

²⁴Лош порок кај човекот е лагата; таа секогаш е во устата на неуките.

²⁵И крадецот е подобар од оној кој постојано лаже, но и обајцата ќе наследат погубност.

²⁶Лагата е срамна навика; срамот е постојан придружник на лажливците.

²⁷Кој мудро говори, тој ќе се издигне; умниот им е мил на управителите.

²⁸Кој својата земја добро ја обработува, богата жетва жнее, а кој знае на управителите да им угодува — во прилика на неправда, ќе биде помилуван.

²⁹Гозбите и подароците ги заслепуваат очите на мудрите; како узда во устата — ги сопираат изобличувањата.

³⁰Каква полза има од сокриена мудрост и од сокриено богатство?

³¹Подобар е оној што ја сокрива својата глупост, од оној што ја сокрива својата мудрост.