Read Lamkang Мудрост Сирахова 24 Bible Online

Мудрост Сирахова 24 - Lamkang bible

Мудрост Сирахова 24

¹Пофалба на мудроста. Мудроста ќе се прослави; меѓу народот свој ќе биде пофалена.

²Во собирот на Севишниот устата своја ќе ја отвори и пред Неговите сили таа ќе се прослави:

³»Излегов од устата на Севишниот и како пареа ја покрив земјата;

⁴во висините шатор раширив; престолот мој во столбот од облак го поставив;

⁵кругот небески го изминав, одев во длабините на бездната.

⁶Мојата власт е над морските бранови и над сета земја, над секој народ и племе.

⁷Почивка барав меѓу сите нив: во чие наследство да се вселам.

⁸Тогаш Создателот на сѐ, Оној, Кој и мене ме создаде, ми посочи живеалиште спокојно и рече:

⁹‚Всели се кај Јаков, стани му наследство на Израел.‘

¹⁰Пред векови, во почетокот, Тој ме создаде, и нема да свршам довека.

¹¹Пред Него служев во светата Скинија, а потоа на Цион се утврдив.

¹²Тој спокој ми даде во саканиот град; во Ерусалим е мојата власт.

¹³Така се вкоренив во прославениот народ, во делот на Господа, во наследството Негово.

¹⁴Израснав како кедар на Леванон и како кипарис на горите Ермонски.

¹⁵Израснав како палма во Ен-Геди и како розова градина во Јерихо;

¹⁶како прекрасна маслина во рамнината и како јавор се извишив.

¹⁷Мирис раширив како цимет и ароматичен балзам; мирис благопријатен, распрснав како смирна избрана,

¹⁸како алаван, оникс и стактит и како мирис од темјан во Скинијата.

¹⁹Како теревинт ги раширив моите гранки, а гранките мои се прекрасни — гранки на слава и благодат.

²⁰Јас сум како лоза што благодат раѓа, плод на слава и богатство се цветовите мои.

²¹Дојдете кај мене вие што ме сакате, наситете се со моите плодови;

²²споменот за мене посладок е од мед, Наследството мое — саќе е од мед.

²³Оние што ме јадат — погладни ќе бидат, а оние што ме пијат — пожедни за мене ќе бидат.

²⁴Кој мене ме слуша — не се посрамува; кој со мене работи — никогаш не греши.

²⁵Сето ова е книга на заветот со Бога Севишен,

²⁶законот што Мојсеј ни го даде за наследство на заедниците од Јакова.

²⁷Тој со мудрост е полн како реките Пишон и Тигар во пролетните денови;

²⁸тој со разум исполнува како Ефрат и Јордан во време на жетва;

²⁹тој исполнува со учење како светлина и како Гион во време на гроздобер.

³⁰Првиот човек не ја позна докрај, не ќе ја доиспита ни последниот.

³¹Мислите нејзини пошироки се од морето, а намерите подлабоки од бездна.

³²А јас сум како канал од река и како воден бран што влегува во градина.

³³И реков: ‚Градината моја ќе ја напојам и леите цветни ќе ги наводнам.‘

³⁴И ете, каналот мој стана река, а реката настана море.

³⁵Како светлина утринска учењето мое ќе светлее, надалеку ќе го покажам,

³⁶како пророштво ќе го излијам, на идните родови ќе им го оставам.

³⁷Гледате: не само за себе се трудев, туку и за сите што мудроста ја бараат.«