Read Lamkang Мудрост Сирахова 29 Bible Online

Мудрост Сирахова 29 - Lamkang bible

Мудрост Сирахова 29

¹Милостиња. Кој зајмува — пројавува милост спрема ближниот свој; кој му помага — заповедите ги извршува.

²Заем давај му на ближниот свој; навреме враќај му што ти позајмил.

³Чесно пази го зборот свој и биди верен — и секогаш ќе најдеш сѐ што ти треба.

⁴Многумина заемот го сметаат како придобивка; со тоа ги огорчуваат оние што им помагале.

⁵Рака целива додека не добие; заради парите на ближниот понизно зборува;

⁶денот на враќањето го одлага тој; се оплакува и вината на тешки времиња ја фрла.

⁷А ако може, половина ќе врати; и тоа како придобивка ќе му го смета;

⁸ако пак не може, зајмодавецот се лишил од парите и без причина во него непријател добил.

⁹Тој ќе му плати со клетви и навреди, а место почест — понижување ќе му врати.

¹⁰Токму поради тоа многумина не сакаат заем да даваат; се пазат попусто загуба да не претрпат.

¹¹но ти кон сиромавиот милостив биди, не оставај го предолго да чека.

¹²Зради Божјата заповед на сиромавиот помогни му; ако нешто му треба, со празни раце не оставај го.

¹³Подобро е парите да ги фрлаш за братот и пријателот, отколку да пропаѓаат и да гнијат под камен.

¹⁴Богатството твое употребувај го според заповедите на Севишниот; тогаш тоа ќе ти донесе поголема полза и од самото злато.

¹⁵Вложи ја милостињата во својата ризница и таа ќе те избави од секоја неволја.

¹⁶Подобро ќе те штити од непријателот твој, отколку тешкиот штит и острото копје.

¹⁷Добриот човек ќе се застапува за ближниот свој, а оној што изгубил срам — ќе го остави.

¹⁸Не заборавај ги добрите дела на оној што се застапил за тебе; душата своја тој за тебе ја дал.

¹⁹Грешникот не се грижи за застапникот свој, неблагодарниот го заборава избавителот свој.

²⁰Застапувањето за други уништило многу богати луѓе; како бранови морски ги разнело;

²¹богати луѓе изгонило од нивните домови; тие скитале меѓу други народи.

²²Грешник, кој станува застапник, барајќи придобивка, по судови оди.

²³На ближниот помогни му колку што можеш, но внимавај и ти да не пропаднеш.

²⁴Главните потреби за живот се: водата, лебот, облеката и покривот над главата.

²⁵Подобро е да живееш сиромашно во дрвена колиба, отколку во туѓа куќа раскошно да се гостиш.

²⁶Биди задоволен и со малку и со многу.

²⁷Тешко е да одиш од куќа во куќа; каде и да се сместиш — не смееш уста да отвориш;

²⁸ќе гоштеваш со јадење и пиење, и благодарност ќе немаш; па дури навреден ќе бидеш, и ќе чуеш:

²⁹»Дојди туѓинецу, трпеза приготви; ако имаш нешто, дај ни — нахрани нѐ« или:

³⁰»Туѓинецу, оди си, братот мој на гости ми доаѓа; куќата ми треба.«

³¹За чувствителен човек тежок е укорот за дадениот потслон — во куќа и префрлување за направена услуга.