Read Lamkang Мудрост Сирахова 33 Bible Online

Мудрост Сирахова 33 - Lamkang bible

Мудрост Сирахова 33

¹Нееднаквост и независност. Кој има страв од Господа, зло нема да го снајде; од искушение Тој го избавува.

²Мудриот не го мрази законот, а кој лицемерно го држи — тој е како брод во олуја.

³Разумен човек во законот се надева и законот за него е како Божја волја.

⁴Подготви го говорот твој, тогаш ќе те слушаат; собери знаење — тогаш одговарај.

⁵Срцето на глупавиот е како тркало од кола, а мислата негова, како оска што се врти.

⁶Пријател лицемерен е како буен коњ; кој и да го јавне — на секого 'ржи.

⁷Зошто еден ден од друг е подобар, кога на сите денови во годината од сонцето им доаѓа светлина?

⁸Разделени се од премудроста на Господа; Тој одделил времиња и празници.

⁹Некои од нив издигнал и осветил, а другите ги вброил во обичните денови.

¹⁰И сите луѓе се од кал, па Адам од земја беше создаден.

¹¹Но по премудроста Своја Господ различни ги создал: на сите различни патишта им определил;

¹²едни благословил и издигнал, други осветил и до Себе ги приближил, а трети проколнал и понизил, и од нивните места ги изместил.

¹³Како што е глината во рацете на грнчарот и тој ѝ дава облик по своја волја, така се и луѓето во рацете на својот Создател, Кој на сите им дава според Својот суд.

¹⁴Како што спроти злото стои доброто, а спроти смртта — животот, така спроти побожниот стои грешникот. Така гледај ги сите дела на Севишниот: сите се по две, едно спроти друго.

¹⁵Јас последен се свестив како оној што бере по гроздоберачи,

¹⁶и со Божји благослов како вистински гроздоберец бочвата моја ја наполнив.

¹⁷Сфатете не се трудев само за мене, туку за сите коишто бараат поука.

¹⁸Чујте ме, кнезови народни, послушајте ме на собирот началници!

¹⁹Ни на жена, ни на син, ни на брат, ниту на пријател не давај им власт над тебе — додека си жив.

²⁰На друг не давај го имотот свој, па ако се премислиш — да молиш да ти го вратат.

²¹Додека си жив, додека здив има во тебе, власт над себеси никому не давај;

²²подобро е децата твои тебе да те молат, отколку ти да гледаш во рацете на твоите синови.

²³Биди господар во сите твои работи; не дозволувај твојата чест извалкана да биде.

²⁴Н крајот од твојот живот, на смртниот час — предај го наследството.

²⁵На магарето давај му: крма, стап и товар, а на слугата — леб, казна и работа.

²⁶На слугата дај му работа, и спокоен ќе бидеш; слободни раце дај му — слобода ќе бара.

²⁷Јаремот и амот му го свиваат вратот на волот, за лошиот слуга се вериги и рани.

²⁸Праќај го на работа — мрзлив да не биде; мрзливоста учи на лоши работи.

²⁹Дај му работа што му одговара, а ако не слуша, стави го во окови,

³⁰но никого од нив не претоварувај; не прави ништо што е неразумно.

³¹Ако имаш слуга, гледај го како себеси, бидејќи со крв си го придобил.

³²Имаш ли слуга, постапувај со него како со брат; од него потреба ќе имаш — како и од својата душа.

³³Ако го измачуваш, па ти избега, по кој пат ќе го бараш?