Read Lamkang Мудрост Сирахова 34 Bible Online

Мудрост Сирахова 34 - Lamkang bible

Мудрост Сирахова 34

¹Соништа. Глупавиот човек празни надежи има, од соништата безумните добиваат крилја.

²Каков што е оној што гушка сенка и што ветар гони, таков е и оној што во сонови верува.

³Соништата и огледалото слични се: и во едното и во другото; — привид е.

⁴Од нечистотоможе ли чисто да биде? Од лагата може ли вистина да биде?

⁵Баење, претскажување и соништа — сето тоа е суета; срцето се полни со пожелби, како кај родилка.

⁶Ако не ги праќа Севишниот за вразумување — не мисли на нив.

⁷Соништата многумина заблудиле; пропаднале и оние што во нив се надевале.

⁸Закон без измама треба да се извршува; мудроста во устата на верните се усовршува.

⁹Учениот човек многу знае; кој многу искусил, разумно зборува.

¹⁰Кој ништо не искусил, тој малку знае; а кој патувал, многу знаења добил.

¹¹Многу видов на моите патувања и знам повеќе отколку што говорам.

¹²Многупати бев во опасност смртна, но се спасив со искуството што го имав.

¹³Духот на оние што страв Господен имаат, ќе живее, зашто нивната надеж е во Оној, Кој ги спасува.

¹⁴Кој од Господа страв има, од ништо не се плаши; надежта негова е Господ.

¹⁵Блажена е душата на оној кој од Господа има страв! Кој го подржува и Кој му е поткрепа?

¹⁶Очите на Господа се врз оние што го љубат; Тој е нивната силна закрила и постојана потпора, брана од горештина и брана од пладневна топлина, заштита од сопнување и заштита од паѓање.

¹⁷Тој ја издигнува душата, Тој ги просветлува очите; Тој дава живот, здравје и благослов.

¹⁸Кој принесува жртва од придобивка неправедна, дарот е од таков подбив; даровите од беззакониците Господ не ги прифаќа.

¹⁹Севишниот не ги сака жртвите безбожнички; со многу жртви гревовите свои нема да ги искупат.

²⁰Каков е оној што жртвува син пред очите на неговиот татко, таков е и оној што принесува жртва од имотот на сиромав.

²¹Лебот на сиромасите живот е за нив: кој им го одзема — како крв да пролева.

²²Кој му ја одзема прехраната на ближниот — тој го убива; а — крв пролева кој на наемникот му ја одзема наградата.

²³Ако еден гради, а друг урива, што добиваат за себе освен тешкотии?

²⁴Ако еден се моли, а друг проколнува, чиј глас Господ ќе чуе?

²⁵Ако некој се измие од допир до мртовец и пак се допре до него, од измивањето тогаш каква му е ползата?

²⁶Таков е човекот што пости за направени гревови, и пак оди и ги повторува, — кој ќе ја чуе неговата молитва и каква полза ќе има што се смирил и се покајал?