Read Lamkang Мудрост Сирахова 40 Bible Online

Мудрост Сирахова 40 - Lamkang bible

Мудрост Сирахова 40

¹Различни мудри поговорки. Многу неволји имаат луѓето, тежок е товарот на синовите Адамови — од денот кога ќе излезат од утробата на мајката до денот кога ќе се вратат при мајката на сите.

²Чекањето на смртта и на нејзиниот ден предизвикува во нив размислување и страв во срцето.

³Почнувајќи од оној што седи на престол славен, до оној што седи во прв и пепел;

⁴од оние што носат круна и профир, до оние што се облечени во партали; —

⁵секој има гнев и завист, неволја и немир, страв од смртта, омраза и расправии, ноќниот сон умот му го поматува.

⁶Малку или како да нема мир; и дење и ноќе тој е како на стража.

⁷Бидејќи збунет од своите срдечни мисли, тој е како бегалец од бојното поле, во страв се буди и кога опасност нема, се чуди на својот страв без причина.

⁸Ова станува со секое суштество, од човек до добиток, но кај грешниците е седумпати повеќе.

⁹Смрт и убиство, караници и меч, неволји и глад, пропаст и удари —

¹⁰сето ова е создадено за грешниците; и потопот беше за нив.

¹¹Сѐ што е од земја — во земја се враќа, а сѐ што е од вода — во море оди.

¹²Поткупот и неправдата гинат, а верноста ќе трае довека.

¹³Имотот на грешниците ќе пресуши како поток, ќе прегрми како силна грмотевица при пороен дожд.

¹⁴Кој штедро дава, тој се радува; престапниците конечно ќе загинат.

¹⁵Потомците на безбожните нема да пуштат фиданки, зашто нечистите корења се врз стрмна карпа.

¹⁶Трска што расте крај брегот на секоја вода, се коси пред секоја друга трева.

¹⁷Добротворството е полно со благослов, а милостињата довека живее.

¹⁸Животот на задоволниот со својата работа и на трудбеникот сладок е, но посладок е на оној од обајцата што нашол богатство.

¹⁹Децата и градењето на нов град името го овековечуваат, но чесната жена стои повисоко и од едното и од другото.

²⁰Виното и музиката го веселат срцето, но подобро и од едното и од другото е љубовта кон мудроста.

²¹Кавалот и гуслето песната ја сладат, но подобар е од нив пријатниот јазик.

²²Очите копнеат по пријатност и убавина, а уште повеќе по зелените полиња.

²³Пријател и другар се среќаваат одвреме навреме, а мажот и жената секогаш се заедно.

²⁴Браќата и пријателите помагаат во неволја, но милостињата и од едните и од другите подобро помага.

²⁵Златото и среброто цврст го прават чекорот, но добриот совет и од нив подобро го зацврстува.

²⁶Богатството и силата го издигнуаат срцето, но повисоко го издигнува стравот од Господа.

²⁷Во стравот Господен недостиг нема; кога него го имаме, друга помош не треба да бараме.

²⁸Стравот Господен е како благословен рај; тој му е заштита поголема од секаква слава.

²⁹Синко мој, не живеј од просење; подобро е да умреш отколку да молиш за милостиња.

³⁰Тој што на туѓа трпеза гледа — неговиот живот не е живот; со туѓи јадења својата душа ја понижува;

³¹разумниот и воспитаниот ќе го одбегнува тоа.

³²Во устата на бесрамниот питачката е слатка, но во утробата гори како оган.