Read Lamkang Мудрост Сирахова 41 Bible Online

Мудрост Сирахова 41 - Lamkang bible

Мудрост Сирахова 41

¹Смрт, Чувство на срам. О смрт, колку горчливо си спомнува за тебе оној, којшто задоволно живее на својот имот;

²Човек што спокојно живее и напредува во сѐ и кој уште може да јаде и да пие!

³О, смрт, твојата пресуда е утешна за оној што страда и што сили нема,

⁴За престарен и затрупан со грижи, за оној што загубил надеж и што трпение нема.

⁵Не плаши се од законот на смртта; спомни си за оние пред тебе и за оние што по тебе идат. Тоа е пресуда од Господа за секое живо суштество.

⁶Зошто се плашиш од она што на Севишниот Му е угодно? Живеел ти десет, сто или илјада години —

⁷во пеколот не се испитува должината на животот.

⁸Децата на грешниците стануваат ужасни, со безбожници се дружат.

⁹Наследството на децата од грешници на пропаст е осудено: потомството нивно вечно прекорувано ќе биде.

¹⁰Безбожниот татко децата негови го колнат, зошто поради него тие се изложени на бесчестие.

¹¹Тешко вам, безбожници, зашто законот на Севишниот Бог го оставивте!

¹²Кога сте се родиле, за проклетство сте родени, а кога ќе умрете — проклетство ќе наследите.

¹³Сѐ што е од земја, во земја се враќа, а безбожниците од проклетство во пропаст ќе појдат.

¹⁴Луѓето плачат по своите мртви, а на грешниците и недоброто име ќе им се избрише.

¹⁵Грижи се за твоето име; тоа останува подолго со тебе, отколку неброено злато.

¹⁶За деновите од добриот живот има број, а доброто име останува довека.

¹⁷Пазете ги, деца, поуките мои во мир; каква е ползата од сокриена мудрост и закопано богатств?

¹⁸Подобар е оној што ја крие својата глупост од оној што својата мудрост ја крие.

¹⁹И така, срамувајте се од она што ќе ви речам:

²⁰не е добро од сѐ да се срамувате ниту сѐ подеднакво се цени.

²¹Срамувајте се од блуд пред татко и мајка, а пред началник и господар — од лага;

²²од злосторство пред судија и кнез; од беззаконие — пред собир и пред народ;

²³од неправда — пред пријател и другар, а од кражба — пред соседите свои;

²⁴пред вистината Божја и заветот, од потпирање лакти на трпеза, од измама при давање и земање;

²⁵срамувај се да молчиш пред оние што те поздравуваат, срамувај се во развратна жена да гледаш и од сонародник лице да свртуваш;

²⁶срамувај се да присвоиш туѓ дел и подарок, на туѓа жена да мислиш и на слугинката своја да ѝ се умилкуваш;

²⁷Не приближувај се до постелата нејзина;

²⁸пред пријател од зборови срамни срамувај се; откако си подарил, не приговарај;

²⁹Срамувај се да повторуваш и да шириш тајни гласови и туѓи тајни да откриваш. Тогаш ќе бидеш вистински воспитан и кај секој човек милост ќе најдеш.