Read Lamkang Мудрост Сирахова 46 Bible Online

Мудрост Сирахова 46 - Lamkang bible

Мудрост Сирахова 46

¹Пофалба на предците. (Продолжеток). Храбр јунак во борбите беше Исус, Навиновиот син и во пророштвата наследник на Мојсеј;

²според своето гоелмо име тој се покажа како голем бранител на Божјите избраници, одмаздувајќи им се на востанатите непријатели, и така Израел да го воведе во наследството негово.

³Колку се прослави кога рацете свои ги издигна и кога мечот свој кон градовите го пружи!

⁴Кој бил некогаш како него? Тој борби Господови водел.

⁵Не застанало ли сонцето од раката негова и од ден — не станаа ли два?

⁶Севишниот Бог тој Го повика, кога од сите страни непријателот го беа опкружиле, и Господ гласот негов го послуша;

⁷град како камења пушти од небото врз непријателите и ги порази противниците по падините на планината,

⁸за да го познаат незнабошците оружјето Негово, дека борбата се одвивала пред Господа, тој само одел по Сесилниот.

⁹И во деновите на Мојсеј добро дело направи, тој и Калев, Јефунеовиот син, кога им се противставија на разбунтуваните, народот го задржаа од грев и ги смирија гласовите на побуната.

¹⁰Од шестотини илјади што патуваа само тие двајца беа спасени, за да го воведат народот во ветената земја — таму каде што тече мед и млеко.

¹¹И му даде Господ на Калев сила, којашто до старост остана во него, за да се искачи по високите места, којашто е наследство на неговото племе;

¹²за да видат сите синови Израелски дека е добро по Господа да се оди.

¹³Така и судиите, секој според своето име, чии срца верни на Господ беа и од Бога не отстапуваа; соменот за нив благословен нека биде!

¹⁴Коските нивни да се расцутат од гробот!

¹⁵Славата на нивното име нека премине на нивните синови — за нивно прославување!

¹⁶Миленикот Господов, Самуил Негов пророк, основа царство и за народот свој цареви му помаза,

¹⁷Според законот на Господ тој му судеше на народот, и Господ го посети Јакова;

¹⁸по својата вера беше вистински пророк, а според она што говореше — вистински предвидуваше.

¹⁹Кога народот од секаде беше притиснат, кон Бога во неволјата своја повика и младо на жртва принесе.

²⁰Тогаш Господ од небо силно загрме и во силната бучава се слушна гласот Негов,

²¹ги погуби водачите тирски и сите кнезови филистејски.

²²Пред да се пресели во вечниот покој, тој посведочи пред Господ и пред Неговиот помазаник: »Од никого имот не сум зел, дури ни обични обувки и никој не го укорив.«

²³И по својата смрт пророкуваше: на царот крајот негов му го објави; и во пророкувањето од земјата гласот свој го подигна, за да го отстрани беззаконието во народот.