Read Lamkang Мудрост Сирахова 50 Bible Online

Мудрост Сирахова 50 - Lamkang bible

Мудрост Сирахова 50

¹Великиот свештеник Шимон. Поука. Заклучок. Великиот свештеник Шимон, син на Онија, за време на својот живот го поправи Божјиот дом, го зацврсти храмот.

²Тој ја стави основата за двојното издигнување — на високата ограда околу храмот.

³Во негово време беше се намалил водостојот, опкружен со ископ, слично на море.

⁴За да го укрепи градот против опсада, тој ги зајакна градските ѕидови.

⁵Колку величествен стануваше меѓу народот кога излегуваше од зад храмовата завеса!

⁶Тој беше како ѕвезда Деница сред облаци, како месечина кога е полна;

⁷како сонце што грее над храмот на Севишниот и како виножито што светлее меѓу величествени облаци;

⁸како роза во пролетни дни, како кринови покрај водни извори и како ливаново гранче во летни дни;

⁹како оган со кадиво во кадилница;

¹⁰како искован златен сад, укрсен со секакви скапоцени камења;

¹¹како маслина со плодови и како кипарис извишен до облаци.

¹²Кога се облекуваше во великолепни одежди, кога ги ставаше сите украси, качувајќи се кон светиот жртвеник, целото светилиште со блесок го исполнуваше.

¹³И кога ги земаше жртвените делови од рацете на свештениците, стоејќи кај огнот на жртвеникот,

¹⁴окружен како со венец од своите браќа свештеници, како леванонски кедрови фиданки и како гранки палмови,

¹⁵и сите Аронови синови во сета своја слава со приноси за Господа на рацете пред целиот собир на Израел.

¹⁶Завршувајќи ја на жртвеникот службата, за да го овенча приносот на севишниот Седржител,

¹⁷ја пружаше раката своја кон жртвената чаша, истураше во неа гроздов сок, го поливаше подножјето од жртвеникот за благопријатен мирис на Царот Севишен.

¹⁸Тогаш синовите Аронови трубеа во труби метални и викаа со силен глас за спомен пред Севишниот.

¹⁹И тогаш сиот народ ничкум на земја паѓаше, за да се поклони пред својот Господ, Седржителот и Севишен Бог.

²⁰А певците со своите гласови Го прославуваа; во огромниот храм умилна песна се огласуваше;

²¹народот на Милостивиот и Севишниот Господ се молеше додека славословието се пееше, и така Божјата служба ја завршуваа.

²²Тогаш, слегуваќи, рацете свои ги подигаше врз целиот собир од синовите Израелски, благословот Господов со устата своја го искажуваше и името Негово да се пофали.

²³А народот уште еднаш ничкум паѓаше, за да го прими благословот на Севишниот.

²⁴И денес, благословувајте Го Бога сите, Кој насекаде големи чуда прави, Кој ги продолжува нашите денови уште од утробата и со нас постапува според Својата милост.

²⁵Тој нека ни даде весело срце и во деновите наши мир да ни подари во Израел од век до век.

²⁶Милоста Негова секогаш да биде со нас и навреме да нѐ избави!

²⁷Од два народа душата моја се обраќа, а третиот и не е народ:

²⁸тоа се оние што живеат на планината Сеир, Филистејците и глупавиот народ што живее во Сиким.

²⁹Оваа мудрост за поука и знаење ја напишав во книга јас, Исус Сираховиот син, од Ерусалим, кој ја изли мудроста на своето срце.

³⁰Блазе му на оној којшто ќе размислува за овие поуки; кој ќе ги стави во своето срце, тој мудар ќе биде,

³¹а кој ги извршува — ќе успее во сѐ зашто Господовата светлина е неговиот пат.