Read Lamkang Исаија 13 Bible Online

Исаија 13 - Lamkang bible

Исаија 13

¹Пророштво за Вавилон, што го изрече Исаија, синот Амосов.

²»Кренете знаме на гола планина, издигнете глас, мавнете им со рака да навлезат низ кнезовските порти.

³Јас им дадов повелба на Моите избраници и ги повикав да го исполнат гневот Мој Моите јунаци, кои се радуваат на величието Мое.

⁴Голем шум има по планините, како божем од многуброен народ, бунтовен шум на царства и народи, собрани заедно, Господ Саваот ја прегледува готовата војска за војна.

⁵Идат од далечна страна, од крајот на небото, Господ и орудијата на Неговиот гнев, за да ја сотрат целата земја.

⁶Липајте, зашто денот Господов е близу, — иде како разурнувачка сила од Семоќниот.

⁷Затоа рацете на сите отпаднаа, срцето на секој човек се стопи.

⁸Тие се ужасија, грчеви и болки ги опфатија; се мачат како родилка, зашеметени гледаат едни во други, лицата им пламнаа.

⁹Ете, денот Господов доаѓа лут, со гнев и пламната јарост, за да ја претвори земјата во пустиња и да ги истреби од неа грешниците нејзини.

¹⁰Ѕвездите небески и светилата нема да даваат од себеси светлина; сонцето се замрачува при изгревањето свое; и месечината не свети со светлината своја.

¹¹Јас ќе го казнам светот за злото, и нечесните — за нивните беззаконија; ќе го премавнам високоумството на гордите и ќе ја понизам надуеноста на угнетувачите;

¹²ќе направам така, што луѓето да бидат поскапи од чисто злато, а мажите — поскапи од офирско злато.

¹³Затоа ќе го затресам небото, земјата ќе се помести од местото свое поради јароста на Господа Саваот, во денот на пламнатиот гнев Негов.

¹⁴Тогаш секој како подгонета срна и како напуштени овци ќе се обрне кон народот свој, секој ќе избега во земјата своја.

¹⁵На кого ќе му се падне, ќе биде пронизан; и кого ќе го фатат, ќе загине од меч.

¹⁶Новороденчињата нивни ќе бидат смачкани пред очите нивни; куќите нивни ќе бидат разграбени, а жените нивни обесчестени.

¹⁷Ете, Јас ќе ги кренам против нив Мидјаните, кои не го ценат среброто и не лакомат за злато.

¹⁸Нивни лакови ќе ги поразат младите и нема да сожалат ни плод во утроба; очите нивни нема да се смилуваат на децата.

¹⁹И Вавилон, украсот на царствата, гордоста на Халдејците, ќе биде соборен од Бога, како Содом и Гомор,

²⁰нема да се насели никогаш, во него нема да има жители од род во род; нема Арабиец да го распне шаторот свој, овчари таму со стадата свои нема да пладнуваат.

²¹Но во него ќе живеат ѕверови; бувови ќе се населат во нивните домови, и бесови ќе потскокнуваат и ќе играат.

²²Шакали ќе вијат во дворците нивни и хиени во домовите за веселба. А ќе дојде неговото време, близу е, деновите негови нема да задоцнат.«