Read Lamkang Исаија 19 Bible Online

Исаија 19 - Lamkang bible

Исаија 19

¹Пророштвото за Египет. Ете, Господ ќе седне на лесен облак и ќе дојде во Египет. И пред лицето Негово ќе затреперат идолите египетски, а срцето на Египет ќе се стопи во него.

²Ќе вооружам Египтјани против Египтјани, — и ќе се бијат брат против брат и пријател против пријател, град со град, царство со царство.

³Духот на Египет ќе изнемошти во него, ќе ги разруши намерите негови, — и ќе прибегнат тие кон идоли и маѓесници, кон оние што повикуваат мртовци и кон бајачи.

⁴Ќе ги предадам Египтјаните во рацете на жесток владетел, свиреп цар ќе владее над нив, — вели Господ, Господ Саваот.

⁵И водите во морето ќе исчезнат, реката ќе секне и ќе пресуши;

⁶реките ќе намалат, каналите египетски ќе станам малуводни и ќе се исушат; рогозината и трската ќе овенат.

⁷Нивите крај реката, по бреговите на реката, и сѐ што е посеано крај реката — ќе се исуши, ќе биде развеано и ќе исчезне.

⁸И ќе заплачат рибари, ќе викаат сите што фрлаат јадици во реката, што поставуваат мрежа во водата, сите ќе бидат очаени;

⁹ќе се вознемират оние, што обработуваат лен и што ткаат бели платна;

¹⁰мрежите ќе бидат скинати, и сите што држат рибници за жива риба — ќе паднат со духот.

¹¹Да! Се избезумија кнезовите танесови; советот на мудрите фараонови советници стана безумен. Како ќе му кажете на Фараонот: »Јас сум син на мудреците, син на древните цареви?«

¹²Каде се тие? Каде се твоите мудреци? Нека ти кажат тие сега; нека дознаат што определил Господ Саваот за Египет?

¹³Се избезумија кнезовите танесови; се измамија кнезовите мемфиски, го свртија Египет од патот на водачите на неговите племиња.

¹⁴Господ спроведе во него зашеметен дух, — го доведоа Египет во заблуда во сите негови дела, како пијан кога повраќа.

¹⁵И нема да има во Египет такво дело, кое би можеле да го извршат главата и опашката, палмата и трската.

¹⁶Во овој ден Египтјаните ќе бидат како жени; ќе затреперат и ќе се уплашат од движење на раката на Господа Саваот, што Он ќе ја крене против нив.

¹⁷Земјата Јудина ќе стане ужас за Египет, кој се сеќава не неа, тој ќе затрепери од решението на Господа Саваот, што го определил Он за него.

¹⁸Во оној ден пет града во Египетската земја ќе говорат на ханански јазик, и ќе се колнат во Господа Саваот; едниот ќе се нарече град на сонцето.

¹⁹Во оној ден ќе има жртвеник на Господа среде Египетската земја и споменик на Господа — во нејзините предели.

²⁰Тој ќе биде знак и сведоштво за Господа Саваот во Египетската земја, зашто тие ќе викаат кон Господа од потисниците, и Он ќе им донесе спасител и застапник, и ќе ги спаси.

²¹И Господ сам ќе се јави во Египет; во тој ден Египтјаните ќе Го познаат Господа и ќе принесат жртви и дарови, ќе Му дадат ветувања на Господа и ќе ги исполнат.

²²И ќе го порази Господ Египет — ќе го порази и ќе го исцели: тие ќе се обрнат кон Господа — и Он ќе ги чуе и ќе ги исцели.

²³Во тој ден ќе има широк пат од Египет до Асирија; и Асур ќе доаѓа во Египет и Египтјани во Асирија; и Египтјани заедно со Асиријците ќе Му служат на Господа.

²⁴Во оној ден Израилот ќе биде трет со Египет и со Асирија; благослов ќе има на земјата,

²⁵која Господ Саваот ќе ја благослови, велејќи: »Благословен да е Мојот народ — Египтјаните делото на рацете Мои — Асиријците, и наследството Мое — Израилот.«