Read Lamkang Исаија 22 Bible Online

Исаија 22 - Lamkang bible

Исаија 22

¹Пророштво за долината на видението. — Што ти е, та цел си се искачил на покрив?

²Шуми граде, кој се брануваш, граде, што ликуваш! Твоите убиени не се убиени од меч, ниту умреле во борба;

³сите твои водачи бегаа заедно, но беа врзани од стрелците; сите што се најдени кај тебе врзани се заедно, колку и да бегаа далеку.

⁴Затоа велам: оставете ме, горко ќе плачам; не трудете се да ме утешувате, поради погибелта на ќерката од мојот народ.

⁵Зашто е ден на вознемиреност, угнетување и збрка во долината на видението од Господа, Бог Саваот. Се соборуваат ѕидови, викањето стигнува до планината.

⁶И Елам зеде јанџик: луѓе со коли, и јавачи.

⁷И ете, најдобрите твои долини се полни со коли бојни, јавачите се наредија спроти портите,

⁸па го симнуваат покривалото од Јудеја; и ти во тој ден ќе погледаш кон избраните домови во градот.

⁹Гледајте, дека има многу пукнатини во ѕидиштата на Давидовиот град, па собравте вода во долниот рибник;

¹⁰и се разрушија куќите ерусалимски, за да се зацврстат ѕидините градски;

¹¹направивте меѓу двата ѕида собиралиште за вода од старото езеро. А на Оној, Кој го направи тоа, не погледнавте, и не Го гледавте Оној, Кој одамна го одреди тоа.

¹²Господ, Господ Саваот ве викаше на тој ден да плачете и да тагувате, да се истрижете и да се опашете во вреќиште.

¹³Но, ете, веселба и радост! Убиваат волови и колат овни; јадат месо, пијат вино и велат: »Да јадеме и да пиеме, зашто утре ќе умреме!«

¹⁴И ми откри во ушите Господ Саваот: »Нема да ви биде простена таа нечесност, додека не умрете,« рече Господ, Господ Саваот.

¹⁵Вака рече Господ, Господ Саваот: »Тргни, оди кај оној царедворец, при Севна, началникот на дворецот, и кажи му:

¹⁶што имаш и кого имаш тука, па си правиш тука гробница? Тој си прави за себе гробница на височината, си прави живеалиште во карпата.

¹⁷Ете, Господ ќе те фрли далеку, како што фрла силен човек и ќе те свитка како клопче,

¹⁸откако ќе те свитка во свиок, ќе те фрли во широка земја; таму ќе умреш ти, таму твоите прекрасни коли ќе бидат за подбивање во домот на твојот господар.«

¹⁹Ќе те турнат од твоето место и ќе те симнат од твоето достоинство.

²⁰И во тој ден ќе го повикам мојот слуга Елијаким, Хелкиевиот син,

²¹ќе го облечам со твојата облека и со твојот појас ќе го препашам, та и власта твоја ќе ја предадам во рацете негови; и тој ќе биде отец на жителите ерусалимски и за домот Јудин.

²²И клучот на Давидовиот дом ќе го ставам на рамењата негови; тој ќе отвори, и никој нема да затвори; тој ќе затвори и никој нема да отвори.

²³И ќе го зацврстувам како клин на цврсто место, тој ќе биде како славно седиште за домот на татка си.

²⁴И на него ќе виси целата слава на татковиот му дом, на децата и внуците, на целата покуќнина до последната свирка.

²⁵Во тој ден, вели Господ Саваот, ќе се заниша зацврстениот на цврсто место клин, ќе биде изваден и ќе падне, ќе се испокрши сѐ, што виси на него, зашто Господ вели.