Read Lamkang Исаија 28 Bible Online

Исаија 28 - Lamkang bible

Исаија 28

¹Тешко му на венецот, со кој се гордеат пијаниците Ефремови! Тешко му на свенатото цвеќе — негов гиздав украс — цвеќе среде наѓубрената долина на замаените од вино!

²Ете, јакиот и силниот во Господа како пороен дожд со град, како погубна луња, како разлеана поплава од бурни води, со рака ќе ги обори сите на земја.

³Со нозе се гази венецот, со кој се гордеат Ефремовци.

⁴И со свенатото цвеќе — неговиот гиздав украс — цвеќе среде наѓубрената долина, станува истото, како што станува со смоквата, рано узреана: штом некој ќе ја види, веднаш ја зема в рака и ја каснува.

⁵Во тој ден Господ Саваот ќе биде убав венец и славна круна за остатокот од Својот народ.

⁶Дух на правосудие за оној што седи во судот и машкост за оние, кои го отфрлуваат непријателот до портите.

⁷Но и тие се нишаат од виното и го збркуваат патот свој од сикер: свештеник и пророк се препнуваат од силни пијалоци; победени се од вино, избезумени од сикер, во гледањето се збркуваат во судењето се сопнуваат.

⁸Зашто сите трпези се полни со одвратни повраќања, нема чисто место.

⁹А велат: »Кого сака тој да учи на знаење, и кога да вразумува со проповед? Дали деца, кои се одбиени од градно млеко, одделени од мајчините гради?

¹⁰Зашто сѐ е заповед врз заповед, заповед врз заповед, правило врз правило, правило врз правило, тука малку и таму малку.«

¹¹Оти со неразбирлив говор и на туѓ јазик ќе му зборуваат на тој народ.

¹²Им говореа: »Еве одмор, дајте му одмор на изморениот, и ете му одмор.« Но тие не сакаа да слушаат.

¹³И стана во нив според словото Господово: заповед врз заповед, заповед врз заповед, правило врз правило, правило врз правило, тука малку, таму малку, — така што тие ќе отидат, ќе паднат ничкум и ќе се разбијат, ќе паднат во стапица и ќе бидат уловени.

¹⁴И така, слушајте го словото Господово, хулители, управници на овој народ, кој е во Ерусалим.

¹⁵Бидејќи говорите: »Сме склучиле сојуз со смртта и со пеколот сме направиле договор: кога ќе минува камшикот, кој поразува сѐ, тој нема да дојде до нас, оти лагата ја направивме наше засолниште и со измама ќе се прикриеме«, —

¹⁶затоа вака вели Господ Бог: »Ете, Јас полагам во основата на Сион камен, — камен испитан, аголен, скапоцен, темелен: кој верува во него, нема да се посрами.

¹⁷Ќе поставам суд за мерило и теразија за правдата; градот ќе го истреби засолништето на лагата, и води ќе го потопат местото на заклонот.

¹⁸И сојузот ваш со смртта ќе биде уништен, договорот ваш со пеколот нема да остане. Кога ќе мине камшикот, кој поразува сѐ, вие ќе бидете згазени.

¹⁹Штом ќе мине тој, ќе ве фати; а тој ќе оди секое утро, дење и ноќе и само слухот за него ќе предизвикува ужас.«

²⁰Многу кратка ќе биде постелката, за да се протега; многу тесна и покривката, за да се завитка со неа.

²¹Зашто Господ ќе се крене, како на гората Ферасим; ќе се разгневи, како во Гаваонската долина, за да го изврши делото Свое, необично дело, и да ја заврши работата Своја, Своја чудна работа.

²²И така, не потсмевајте се, за да не станат оковите ваши поцврсти; зашто јас чув од Господа, Бога Саваот, дека е одредено истребување за целата земја.

²³Приклонете го увото и полушајте го гласот мој; бидете внимателни, ислушајте ја речта моја.

²⁴Земјоделецот секогаш ли ора, за да посее, секогаш ли ора бразди и ја израмнува земјата своја?

²⁵Не, откако ќе ѝ го израмни лицето, тој сее граор, распрскува ким или фрла пченица, на редови и јачмен во определеното место, а најпосле 'рж по сртовите.

²⁶И на таков ред го учи неговиот Бог; Он го упатува.

²⁷Зашто не вршат граор со чукање, ниту тркалата што вршат го газат кимот; туку со стап го чукаат граорот, и со стап го чукаат и кимот.

²⁸Житото го вршат, но не го дробат; пуштаат преку него вршечки колца со коњи, но не го смачкуваат.

²⁹И тоа станува од Господа Саваот: чудни се неговите судови, голема е Неговата премудрост!