Read Lamkang Исаија 3 Bible Online

Исаија 3 - Lamkang bible

Исаија 3

¹Ете, Господ, Господ Саваот ќе го одземе од Ерусалим и од Јуда жезалот и помошта, секоја поткрепа во леб и вода,

²храбар водач и војник, судија и пророк, јасновидец и старец,

³петдесетник и големец, советник, мудар уметник и вешт гатач.

⁴Ќе им дадам момчиња за началници, и деца ќе владеат над нив.

⁵А во народот еден ќе угнетува друг, и секој својот ближен; момче бесрамно ќе се прави голем пред старец и простак — пред големец.

⁶Тогаш човек ќе се фати за братот свој, во челадта на татка си свој и ќе рече: »Ти имаш облека, биди ми водач, и овие урнатини нека бидат под твоја рака.«

⁷А тој со клетва ќе рече: »Не можам да ги излекувам раните на народот; и во мојата куќа нема ни леб, ни облека: не правете ме водач на народот.«

⁸Така пропаднал Ерусалим, и падна Јуда, зашто јазикот нивни и делата нивни се против Господа, навредливи пред очите на Неговата слава.

⁹Изразот на лицето нивно сведочи против нив, а за гревот свој тие кажуваат отворено, како содомците, не кријат: тешко на душата нивна! Сами на себеси навлекуваат зло.

¹⁰Кажете му на праведникот: »Блазе му, зашто тој ќе ги јаде плодовите на делата свои;

¹¹а на беззаконикот — тешко нему, оти ќе има отплата за делата на рацете свои.

¹²Притеснители на Мојот народ се децата, и жени владеат над него. Народе Мој, твоите водачи те доведуваат до заблуда и го растуриле патот, по кој одиш.«

¹³Се крена Господ на суд — и стои, за да им суди на народите.

¹⁴Господ влегува во суд со старешините на Својот народ и со неговите кнезови: вие го опустошивте лозјето; ограбеното од сиромасите е во вашите куќи.

¹⁵»Зошто го притеснувате народот Мој и ги угнетувате сиромасите?« вели Господ, Господ Саваот.

¹⁶Потоа рече Господ: »Поради тоа што ќерките сионски се гордеат и одат со исправени вратови, што освојуваат со погледите, и ситно одат и со веришки на нозете тропкаат.«

¹⁷Господ ќе го оголи темето на ќерките сионски, и ќе го открие срамот нивни;

¹⁸во оној ден Господ ќе ги одземе убавите веришки на нозете, секакви ѕвездички и месечинки,

¹⁹обетки, ѓердани и ладила, превези, гривни и појаси, стакленца со мириси и уметнички украси,

²⁰прстење и алки за нос,

²¹горна облека и долна, шамичиња и торбички,

²²светли тенки наметки, забратки и покривала.

²³И наместо пријатен мирис ќе има смрад и место појас — јаже, место кадрени коси — ќелави глави, наместо широка наметка — тесно вреќиште, место убавина — жигосување.

²⁴Мажите твои ќе паднат од меч, а јунаците твои во битка,

²⁵и портите на престолнината ќе воздивнуваат и ќе плачат, а таа ќе седи напуштена на земјата.