Read Lamkang Исаија 41 Bible Online

Исаија 41 - Lamkang bible

Исаија 41

¹Молкнете пред Мене, острови, и нека народите ги обноват силите свои; нека се приближат и нека речат: да излеземе заедно на суд.

²Кој Го издига од исток Праведникот, кој Го повикува да оди пред Него? Кој Му ги предаде народите и Му ги покори царевите? Он ги претвори во прав со Неговиот меч, со Неговиот лак — во плева, развеана од ветар.

³Он ги гонеше, одеше спокојно по патот, по кој никогаш не беше одел со нозете свои.

⁴Кој го направи и изврши тоа? Оној, Кој во почетокот ги повика родовите; Јас, Господ, Јас сум првиот, и меѓу последните — Јас сум истиот.

⁵Островите видоа и се ужасија, краиштата земни затреперија. Тие се зближија и се собраа;

⁶секој му помага на другарот свој и му вели на братот свој: »Држи се!«

⁷Ковачот го бодри леарот; кој ги сплескува со чекан листовите, му одобрува на оној, што кова на ковална, велејќи за спојката: »добра е«; и ја зацврстува со клинци, за да биде цврста.

⁸»А ти, ти Израиле, слуго Мој, Јакове, кого Јас те избрав, семе на Авраама, пријателе Мој,

⁹ти, кого го зедов од краиштата на земјата и го повикав од краиштата нејзини, и ти реков: Ти си Мој слуга, Јас те избрав и нема да те отфрлам.

¹⁰Не плаши се, зашто Јас сум со тебе; не се вознемирувај, зашто Јас сум Бог твој; Јас ќе те закрепам и ќе ти помогнам, ќе те поддржам со десницата на Мојата правда.«

¹¹Ете, постидени и засрамени ќе останат сите, што се наежени против тебе, — ќе бидат како ништо и ќе загинат оние што се препираат со тебе.

¹²Ќе ги бараш — и нема да ги најдеш, нив, кои непријателствуваат против тебе; кои се борат со тебе; ќе бидат како ништо, наполно ништо;

¹³зашто Јас сум Господ, Бог твој; те држам за твојата десна рака, ти велам: »не плаши се, Јас ти помагам.«

¹⁴»Не се плаши, црву Јакове, малуброен Израиле, — Јас ти помагам, вели Господ, Јас твој Искупител, Светецот Израилев.«

¹⁵Ете, Јас ќе ти направам остар дикел, нов, назабен; ти ќе ги кршиш и ќе ги ситниш планините, и ридовите ќе ги направиш како прав.

¹⁶Ти ќе вееш, ветрот ќе ги разнесе, и виорот ќе ги развее; а ти ќе се зарадуваш во Господа, ќе се фалиш со Светецот Израилев.

¹⁷Сиромаси и неимотни бараат вода, и нема, јазикот им се исушува од жед: Јас, Господ ќе ги чујам, Јас, Бог Израилев, нема да ги оставам.

¹⁸Ќе отворам реки на врвот од горите и извори среде долини; пустињата ќе ја направам езеро и сувата земја — водни извори;

¹⁹ќе насадам во пустиња кедар, ситим, мирта и маслинка, ќе насадам во степите кипарис, јавор и бука наедно,

²⁰за да видат и познаат, и да ги разгледаат и разберат, дека раката Господова го направи тоа, дека Светецот Израилев го создаде тоа.

²¹Претставете го делото свое, вели Господ; дајте ги доказите свои, вели Царот Јаковов.

²²Нека дојдат и нека ни кажат што ќе биде; нека објават нешто, пред да стане, и ние ќе проникнеме со умот свој и ќе дознаеме, што ќе биде потоа, или нека ни претскажат за иднината.

²³Кажете што ќе биде во иднина, и ние ќе познаеме дека сте богови, или направете нешто добро или лошо, за да се зачудиме и заедно со вас да видиме.

²⁴Но вие сте ништо, и делото ваше е ништожно; одвратен е оној што ве избра.

²⁵Јас го подигнав од север, и тој ќе дојде; од изгрев сонце ќе го повикува името Мое и ќе ги гази кнезовите како кал, и ќе ги гази, како грнчар глината.

²⁶Кој објави за тоа од почетокот, за да знаеме, и многу порано, за да можеме да кажеме: »навистина?« Но никој не кажал, никој не објавил, никој не ги чул вашите зборови.

²⁷Јас прв реков на Сион: »ете го, и му дадов на Ерусалим благовесник.«

²⁸И така, Јас гледав, и немаше никого, меѓу нив не се најде советник, за да можам да ги прашам, и тие да одговорат.

²⁹Ете, сите тие се ништо, ништожни се и делата нивни: ветар и ништожност се нивните идоли.