Read Lamkang Исаија 9 Bible Online

Исаија 9 - Lamkang bible

Исаија 9

¹Поранешното време ја понизи земјата Завулонова и земјата Нефталимова; но подоцнежното — ќе го возвеличи крајморскиот пат, од онаа страна на Јордан, незнабожечка Галилеја.

²Народот, кој оди во темнина, ќе види голема светлина; врз оние што живеат во земјата на смртната сенка ќе болсне светлина.

³Ти ќе го умножиш народот, ќе ја зголемиш радоста негова. Тој ќе се весели пред Тебе, како што се веселат за време на жетва, како што се радуваат при делење на плен.

⁴Зашто јаремот, кој му тежеше, и жезлото, што го поразуваше, и стапот на неговиот угнетувач — Ти ќе ги скршиш, како во денот на Мадијама.

⁵Оти секоја војничка обувка во време на војна и облека, извалкана од крв, ќе бидат предадени на изгорување, за храна на огнот.

⁶Зашто Младенец ни се роди — Син ни се даде; власта е на рамењата Негови, и ќе Го наречат: Советник, Чудесни, Бог силен, Отец вечен, Кнез на мирот.

⁷Неговата власт и мирот бескраен ќе растат врз престолот на Давида и во царството негово, за да го утврди Он и да го зацврсти преку суд и правда отсега па довека. Тоа ќе го направи ревноста на Господа Саваота.

⁸Господ му испраќа слово на Јакова, тоа слегува врз Израилот,

⁹за да знае сиот народ, Ефрем и жителите на Самарија, кои со гордост и надуено срце велат:

¹⁰»Тулите паднаа, — ќе градиме со делкани камења; смоквите се исечени, — ќе ги замениме со кедри.«

¹¹Ќе ги крене Господ против него непријателите на Ресина, ќе ги вооружи непријателите негови;

¹²Сиријците од кај исток, Филистејците од кај запад; ќе го голтнат Израилот со полна уста. При сето тоа гневот Негов нема да се одврати и раката Негова ќе биде протегната.

¹³Но народот не се обрнува кон Оној, Кој го бие и не прибегнува кон Господа Саваот.

¹⁴Господ ќе му ја пресече на Израилот главата и опашката, палмата и трската во еден ден:

¹⁵старецот и големецот — тоа е главата; а пророкот — лажниот учител е опашот.

¹⁶Водачите на овој народ ќе го доведат во заблуда, а водените од нив ќе загинат.

¹⁷Затоа Господ нема да се радува на момчињата негови, и нема да се смили над сираците негови и вдовиците негови; зашто сите тие се лицемери и злодејци, и устата на сите зборува нечесно. При сето тоа гневот Негов нема да се одврати и раката Негова уште е протегната.

¹⁸Зашто беззаконието како оган се разгорело, голтнува глог и трн и гори во горските гасталаци, се креваат столбови од дим.

¹⁹Гневот на Господа Саваот ќе ја изгори земјата, народот ќе стане како храна за огнот, човек нема да го пожали братот свој.

²⁰Ќе сечат надесно — и ќе си останат гладни; ќе јадат налево — и нема да се наситат; секој ќе го јаде месото од својата мишка:

²¹Манасија — Ефрема, и Ефрем — Манасија, обајцата заедно — Јуда. При сето тоа нема да се одврати гневот Негов, и раката Негова уште е протегната.